Թուրքիոյ ուժանիւթի նախարար Ալփարսլան Պայրաքտար յայտնեց, թէ ատրպէյճանական կազը 2 Օգոստոսէն սկսեալ Քիլիսի վրայով պիտի փոխադրուի Հալէպ:
Իսկ Սուրիոյ հարաւային Սուէյտա գաւառին մէջ աշխուժացող տիւրզիներու «Արժանապատուութեան տղամարդիկ» կազմակերպութեան ղեկավար Լէյս Պալաուս ժխտեց ապօրինի միջոցներով Լիբանան փոխադրուելու մասին լուրերը, հաւաստիացնելով որ տակաւին կը գտնուի Սուէյտա՝ շարունակելու համար զինադադարի գործադրութեան փուլերը: Անոր համաձայն, իր Լիբանան անցնելու մասին լուրերը տարածած էին նախկին վարչակարգին հետ առնչուած մարդիկ: Շէյխը յայտնեց, թէ իրենք որեւէ դաւադրութիւն չեն մշակեր, սակայն ոմանք կը փորձեն Սուրիոյ խռովութիւնները փոխանցել հարեւաններուն: «Պատուաւոր են նախկին երեսփոխան Ուալիտ Ճոմպլաթին դիրքորոշումները», ըսաւ ան: Նշենք, որ տեղեկութիւններ տարածուած էր Պալաուսի Լիբանան փոխադրութեան մասին, ահազանգելով թէ այդ կրնայ խռովութիւններ յառաջացնել տիւրզիաբնակ շրջաններուն մէջ:
