Սուրիոյ մէջ շուտով տեղի պիտի ունենան խորհրդարանական ընտրութիւններ: Ընտրական գերագոյն յանձնաժողովի նախագահ Մոհամմատ Թահա Ահմատ յայտնեց, թէ սուրիական զանազան կողմերու հետ խորհրդակցութիւններու լոյսին տակ կազմուած է ընտրական նոր օրէնքին պատկերացումը եւ որոշուած է խորհրդարանին երեսփոխաններուն թիւը 150-էն բարձրացնել 210-ի, որպէսզի բոլոր շրջանները ունենան աւելի լաւ ներկայացուցչութիւն: Հանրապետութեան նախագահը պիտի նշանակէ 70 երեսփոխան, մնացեալն ալ պիտի ընտրուին ժողովրդային քուէարկութեամբ, որ տեղի պիտի ունենայ 15-էն 20 Սեպտեմբերի միջեւ: Ըստ ընտրական յանձնաժողովին, քուէարկութեան հոլովոյթը դիտարկելու հնարաւորութիւն պիտի տրուի միջազգային կազմակերպութիւններուն, ինչպէս նաեւ պիտի երաշխաւորուի ընտրական արդիւնքները բողոքարկելու իրաւունքը:
Սուրիոյ նախագահ Ահմատ Շարաա հեռաձայնային հաղորդակցութիւն մը ունեցաւ իր ֆրանսացի պաշտօնակից Էմանուէլ Մաքրոնի հետ: Ան շեշտեց, որ կառավարութիւնը պիտի յարգէ երկրին կայունութիւնը պահպանելու պարտականութիւնը, խստիւ դատապարտելով Սուրիոյ ներքին հարցերուն արտաքին միջամտութիւնները: Շարաա Սուէյտան համարեց Սուրիոյ անքակտելի մասնիկը:
Ֆրանսայի մէջ իր ունեցած տեսակցութիւններուն ընթացքին սուրիական նախարարական պատուիրակութիւն մը շեշտած է Սուրիոյ միասնականութեան եւ գերիշխանութեան պահպանումը, զանոնք համարելով անսակարկելի սկզբունքներ: Ըստ սուրիական պատուիրակութեան, հարաւային Սուէյտան Սուրիոյ անբաժանելի մասնիկն է, իսկ անոր բնակիչները՝ սուրիական հաւաքականութեան կարեւոր բաղադրիչ: Մաքրոն, իր կարգին, Դամասկոսին կոչ ուղղեց պատժելու բռնարարք գործողները եւ կատարելու երկխօսութիւն՝ միաւորելու համար երկիրը:
Ֆրանսայի Ընդհանուր դատախազութիւնը պահանջեց ձերբակալութեան նոր յուշագիր մը հրապարակել Սուրիոյ նախկին նախագահ Պաշշար Ասատի նկատմամբ՝ «2013-ին քիմիական նիւթերով գործուած արիւնալի յարձակումին պատճառով»: Նշենք, որ Ֆրանսայի Վճռաբեկ ատեանը օրեր առաջ չեղարկած էր Ասատի ձերբակալութիւնը պահանջող առաջին յուշագիրը:
Մարդկային իրաւունքներու սուրիական դիտարանը մինչ այդ հաղորդեց, թէ Սուրիոյ նախկին վարչակարգի տապալումէն ետք գործադրուած է առանց դատավարութեան հրապարակային 3369 մահապատիժ:
