Կազայի մէջ շարունակուող իսրայէլեան գործողութիւններուն զուգահեռ, Միացեալ Նահանգներու նախագահ Տոնըլտ Թրամփ յայտնեց, թէ Կազայի մէջ իսկական սով է, խոստանալով հաստատել քաղաքացիներուն առանց սահմանափակումի սնունդ մատակարարող կէտեր: Ամերիկացի նախագահին համաձայն, անհրաժեշտ է զինադադար յայտարարել Կազայի մէջ եւ օգնութիւն փոխանցել քաղաքցիներուն:
Եգիպտոսի իշխանութիւնները երէկ յայտարարեցին, թէ մարդասիական օգնութիւն փոխադրող բեռնակառքերը Եգիպտոսէն Կազա մուտք գործած են Քարմ Ապու Սալէմ անցակէտին վրայով: Մարդասիրական օգնութիւններու փոխանցումին մասնակցեցան նաեւ յորդանանեան զինուած ուժերը, որոնք Արաբական Միացեալ Էմիրութիւններուն մասնակցութեամբ մարդասիրական օգնութիւններով բեռնուած փաթեթներ օդանաւով նետեցին Կազայի զանազան շրջաններու վրայ: «Մենք դրամական օգնութիւն յատկացուցինք Կազային, սակայն մեզի շնորհակալութիւն յայտնող չեղաւ», դժգոհեցաւ Թրամփ: Իսկ արտաքին գործերու նախարար Մարքօ Ռուպիօ յայտնեց, թէ զգալի յառաջընթաց գրանցուած է Կազայի բանակցութիւններուն առումով: Միւս կողմէ, Կազայի մէջ Համասի ղեկավար Խալիլ Հայյէ յայտնեց, որ զինադադարի բանակցութիւնները անիմաստ են, մինչ կը շարունակուի Կազայի պաշարումը եւ բնակչութեան սովը:
Միջին Արեւելքի հարցով ամերիկացի յատուկ պատուիրակ Սթիվ Ուիթքոֆ իր կարգին յայտնեց, թէ Համասի հետ բանակցութիւնները սկսած են վերադառնալ ճիշդ հունին: «Խաղաղութեան աբրահամեան համաձայնութիւնները պիտի ընդարձակուին եւ անակնկալ պիտի չըլլայ, եթէ մինչեւ տարեվերջ 10 երկիր եւս միանայ համաձայնութեան», ըսաւ ան:
