Երեքշաբթի, 22 Յուլիս 2025-ին, Երեւանի Կարէն Դէմիրճեանի անուան մարզահամերգային համալիրին մէջ, տեղի ունեցաւ լիբանանահայ արուեստագէտ Սէրուժ Պաղտասարեանի կողմէ մշակուած եւ Հայաստանի պետական սիմֆոնիք նուագախումբին կողմէ մեկնաբանուած ստեղծագործութիւններու համերգը։
Բեմէն հնչեցին եւ ներկաներուն մեծ տպաւորութիւն ձգեցին ազգային ու հայրենասիրական սիրուած երգեր ու աւանդական երաժշտութիւններ, որոնք Սէրուժ Պաղտասարեանի տաղանդին ու վարպետութեան շնորհիւ արդի մօտեցումներով մշակուած են՝ ստանալով նոր հնչեղութիւն ու կեանք:
Մօտ երկու ժամ տեւած համերգային ծրագիրին ճամբով սրահին երկու յարկերը լեցուցած հանդիսատեսները ապրեցան ճամբորդութիւն մը, որուն ընթացքին իւրաքանչիւրը կարողացաւ գտնել բաժին մը իր հայրենիքէն, անդրադարձ մը հայու ազգային ոգիէն, զգաց հողին ուժն ու ազգային արմատը ամուր պահելու կարեւորութիւնը, ապրեցաւ հին, բայց նոր շունչ ստացած երաժշտութեամբ։ Արուեստասէրները ինքնաբուխ կերպով սրահին մէջ պար բռնեցին տպաւորիչ երաժշտութեան կշռոյթով՝ անմոռանալի պահեր դրոշմելով իրենց էութեան խորն ու յիշատակներուն մէջ։
Նշենք, որ Հայաստանի պետական սիմֆոնիք նուագախումբին հետ ելոյթ ունեցան նաեւ Երեւանի պետական Կամերային նուագախումբը եւ «Կամերտոն» վոքալ խումբը:
(Համադրում)
