Ժորժ Ապտալլայի ազատ արձակումէն օր մը առաջ, Փարիզի մէջ տեղի ունեցաւ վարչապետ Նաուաֆ Սալամի տեսակցութիւնը Ֆրանսայի նախագահ Էմանուէլ Մաքրոնի հետ: Էլիզէի պալատին մէջ տեղի ունեցած ժողովին ընթացքին Մաքրոն վերահաստատեց իր երկրին աջակցութիւնը Լիբանանին, խոստանալով տրամադրել 75 միլիոն եւրոյի արտակարգ նպաստ մը: Սալամ իր այս առաջին այցելութեան ընթացքին ներկայացուց Լիբանանի դիմագրաւած մարտահրաւէրները, վերահաստատելով որ կառավարութիւնը յանձնառու կը մնայ տեղական եւ միջազգային վստահութեան վերականգնումին: Մաքրոն, իր կարգին, կարեւորեց արմատական բարեկարգումներու իրականացումը, Փարիզին յանձնառութիւնը յայտնելով Լիբանանի անկախութեան, գերիշխանութեան եւ ամբողջականութեան: Անոր համաձայն, Փարիզի մէջ շուտով պիտի գումարուի Լիբանանին օժանդակող երկիրներու եւ կազմակերպութիւններու ժողով: Սալամ իր կարգին նշեց, թէ հանգիստ կը վերադառնայ Պէյրութ, ստանալէ ետք Լիբանանին աջակցելու ֆրանսական խոստում:
