Սուրիոյ մէջ կը հետաքննուին նաեւ իշխանափոխութեան յաջորդած օրերուն ծովեզերեայ շրջանին մէջ տեղի ունեցած միջադէպերը: Հետաքննիչ համապատասխան յանձնախումբի բանբեր Եասէր Ֆարհան յայտնեց, թէ 7-8 Մարտին Սուրիոյ ծովեզերեայ բնակավայրերուն մէջ տեղի ունեցած են վայրագութիւններ, հաստատուած է 1426 մարդու սպանութիւնը՝ ներառեալ քաղաքացիներ եւ զինուորականներ: «Կարգ մը յանցագործներ կազմած էին գողութեան եւ թալանումի աւազակախումբեր, ուրիշներ ալ կը ներկայանային որպէս ապահովական ուժերու անդամներ՝ անձնական շահ ապահովելու համար», ըսաւ Ֆարհան՝ հաւաստիացնելով, որ միջադէպերուն յարանուանական պատկերին ենթանպատակը վրէժխնդրական էր, ոչ թէ գաղափարախօսական:
Սուրիոյ հարցով կը շարունակուին նաեւ արտաքին մեկնաբանութիւնները: Թուրքիոյ արտաքին գործերու նախարար Հաքան Ֆիտան ազդարարեց Սուրիան պառակտելու վտանգաւոր հետեւանքներէն եւ զգուշացուց, որ Թուրքիա ուղղակի պիտի միջամտէ՝ կանխելու համար Սուրիոյ մասնատումը, այդ համարելով Թուրքիոյ ազգային անվտանգութեան դիմաց ցցուող վտանգաւոր սպառնալիք մը:
