Ընկերվար յառաջդիմական կուսակցութիւնը Սուրիոյ պետութեան, Սուէյտայի ժողովուրդին եւ արաբ ցեղախումբերուն կոչ ուղղեց զինադադարի ամրապնդումը համարելու առաջնահերթութիւն, զերծ մնալով վրէժի կոչերէն: Կուսակցութիւնը նշեց, թէ Սուրիոյ կառավարութեան պարտականութիւնն է լուրջ աշխատանք տանիլ անկայուն վիճակը հանդարտեցնելու եւ տիւրզիաբնակ գիւղերուն վրայ յարձակումները զսպելու: Քլեմանսոյի մէջ, նախկին կուսակցապետ Ուալիտ Ճոմպլաթ ընդունեց նախկին վարչապետներ Ֆուատ Սինորան, Թամմամ Սալամն ու Նեժիպ Միքաթին, ներկայութեամբ երեսփոխան Թէյմուր Ճոմպլաթի: Նախկին վարչապետները իրենց ամբողջական աջակցութիւնը յայտնեցին Ճոմպլաթի ազգային դիրքորոշումներուն եւ կոչ ուղղեցին խուսափելու խռովութիւններէն, այլ շարքերը միաւորելու եւ կանխելու խնդիրներուն տարածումը:
Սուրիոյ հարցով ամերիկացի յատուկ պատուիրակ Թոմ Պարրաք յայտնեց, որ Սուրիոյ նախագահը եւ Իսրայէլի վարչապետը ամերիկեան աջակցութեամբ որոշած են զինադադար յայտարարել: Պարրաք Սուրիոյ մէջ գործող զինեալ ապօրինի խմբակներուն յորդորեց յանձնել զէնքերը: Ան նշեց, թէ Սուրիոյ նկատմամբ սահմանուած պատժամիջոցները չեղարկելու մասին Միացեալ Նահանգներու նախագահ Տոնըլտ Թրամփի որոշումը սուրիացիներուն հնարաւորութիւն տուած է յաղթահարելու տառապանքներու եւ վայրագութիւններու փուլը: «Միջազգային ընտանիքը զգուշաւոր լաւատեսութեամբ կը հետեւի Սուրիոյ մէջ առկայ ցաւի մշակոյթը յուսալի ապագայի վերածելու փորձերուն», ըսաւ Պարրաք՝ շեշտելով, թէ զինեալ բոլոր կազմակերպութիւնները պէտք է յանձնեն իրենց զէնքը եւ վերջ տան թշնամական գործողութիւններուն, հրաժարելով վրէժխնդրութեան ցեղախմբային տրամաբանութենէն: Իսկ Յորդանանի Արտաքին գործերու նախարարութիւնը յայտարարեց, թէ նախարար Այման Սաֆատի իր սուրիացի պաշտօնակից Ասաատ Շիպանիի եւ ամերիկացի պատուիրակ Թոմ Պարրաքի հետ Ամմանի մէջ գումարած է ժողով մը՝ քննարկելու համար Սուէյտա գաւառին զինադադարը ամրապնդելու միջոցները:
