ՄԱԿ-ի մարդկային իրաւունքներու յանձնակատարը յայտնեց անյապաղ հետաքննել Սուրիոյ հարաւային շրջաններուն մէջ տնցնող օրերուն տեղի ունեցած իրադարձութիւնները, յայտնաբերել պատճառները եւ պատասխնատուները: Մարդկային իրաւունքներու սուրիական դիտարանը իր կարգին նշեց, որ հարաւային շրջանի խնդիրները պատճառած են աւելի քան 500 զոհ: Սուրիոյ հարաւային Սուէյտա գաւառին մէջ յայտարարուած զինադադարը երէկ խախտուեցաւ եւ բախումներ տեղի ունեցան ցեղախումբերու զինեալներուն եւ տեղացիներուն միջեւ: «Սանա» լրատու գործակալութիւնը հաղորդեց, թէ զինեալ կազմակերպութիւններ սպանդ գործած են Սուէյտա գաւառի ցեղախումբերուն մէջ: Իսկ Սուրիոյ հեռատեսիլի պաշտօնական կայանը հաղորդեց, թէ ներքին ապահովութեան ուժերը ուղղուած են Սուէյտա՝ միջամտելու երկու կողմերուն միջեւ եւ հանդարտեցնելու վիճակը: Սուրիոյ հարաւային շրջանի ցեղախումբերու համախմբումի նախագահ շէյխ Ռաքան Խուտէյր վտանգաւոր որակեց վիճակը եւ դիտել տուաւ, որ ցեղախումբերու շուրջ երկու հազար անդամ գերեվարուած է տիւրզիներուն կողմէ:
Սուրիոյ արտակարգ իրավիճակներու եւ աղէտներու տնօրինումի նախարար Ռաէտ էլ-Սալէհ յայտնեց, թէ առնչակից նախարարութիւններու հետ կազմուած է գործողութիւններու միացեալ գրասենեակ՝ արագ արձագանգելու համար քաղաքացիներուն կարիքներուն: Անոր համաձայն, անցնող երկու օրերուն օգնութիւն տրամադրուած է 570 վիրաւորի, փոխադրուած է 87 զոհի մարմին եւ հարիւրաւոր ընտանիքներ տեղաւորուած են աւելի ապահով շրջաններու մէջ:
