Սուրիոյ հարցով ամերիկացի պատուիրակ Թոմ Պարրաք խստիւ դատապարտեց Սուէյտայի քաղաքայիներուն նկատմամբ կատարուած ոտնձգութիւնները, բոլոր կողմերէն պահանջելով հանդարտիլ ու երկխօսութիւն կատարել՝ ամրացնելու համար երկարատեւ զինադադար մը եւ պատժելու յանցագործները: Ամերիկացի արտաքին գործերու նախարար Մարքօ Ռուպիօ մտահոգութիւն յայտնեց իսրայէլեան հարուածներէն, կոչ ուղղելով ինքնազսպումի:
Հանրապետութեան նախագահ Ժոզէֆ Աուն դատապարտեց Սուէյտայի իսրայէլեան հարուածները, շեշտելով թէ այդ տարածաշրջանային վիճակը կրնայ մատնել վտանգաւոր անկումի: Վարչապետ Նաուաֆ Սալամ յայտարարութեամբ մը դատապարտեց Սուրիոյ դէմ իսրայէլեան հարուածները, տեղի ունեցածը համարելով Սուրիոյ գերիշխանութեան բացայայտ խախտում: Սալամի համաձայն, կարելի չէ ընդունիլ հրթիռային նամակները:
Ընկերվար յառաջդիմական կուսակցութեան նախկին նախագահ Ուալիտ Ճոմպլաթ մեկնաբանեց Սուրիոյ հարցերուն Իսրայէլի միջամտութիւնը եւ դիտել տուաւ, որ Իսրայէլ տիւրզիները չի պաշտպաներ, այլ կը շահագործէ զանոնք: Իսկ նախկին նախարար Ուիամ Ուահապ յայտնեց, թէ Իսրայէլի տիւրզիները պիտի սկսին շարժիլ, լիբանանացիներէն ալ պահանջելով մասնակցութիւն Սուէյտայի մէջ տեղի ունեցածէն բողոքող շարժումներուն:
Լիբանանի մէջ տիւրզիներու հոգեւոր առաջնորդ Սամի Ապի էլ-Մունա կարծիք յայտնեց, որ տիւրզիները հեռացնելու ծրագիր գոյութիւն չունի, այլ կան կարգ մը աւազակախումբեր եւ որոշ ծայրայեղական ուժեր: «Մտավախութիւն ունինք, որ Սուրիոյ մէջ պատահածը փոխանցուի Լիբանան, ուստի կը պահանջենք անյապաղ լուծում գտնել այս խնդիրին», ըսաւ ան:
