Լիբանանեան բանակի հրամանատարութիւնը յայտարարեց, թէ Հետախուզական ծառայութենէն ջոկատ մը երկու բնակարան խուզարկած է Թրիփոլիի եւ Պրիթէլի մէջ, ուր ձերբակալած է ապօրինի հրաձգութեան համար հետապնդուած երկու քաղաքացի: Զոյգ բնակարաններէն գրաւուած է զէնք, զինամթերք, թմրանիւթ, կեղծ դրամ եւ ապօրինի այլ սարքեր, որ փոխանցած են հետաքննիչներուն: Իսկ Ժպէյլ գաւառի Հալաթ շրջանին մէջ բանակը ձերբակալած է Լիբանանի մէջ ապօրինաբար գտնուող 64 սուրիացի: Բանակը այլ հաղորդագրութեամբ մը յայտարարեց Պեքաայի հիւսիսային Եամմունէ գիւղին մէջ թմրանիւթի արտադրութեան մեծագոյն գործարաններէն մէկը խուզարկելու, սարքերը կործանելու եւ զանազան տեսակի մեծաքանակ թմրանիւթերու պահեստ մը առգրաւելու մասին: Այս յատուկ գործողութեան ընթացքին յայտնաբերուած է նաեւ 300 մեթր երկարող գետնափոր ուղի մը, որ կը գործածուէր որպէս գործարանի ապահով մուտք ու ելք, ինչպէս նաեւ մթերանոց: Բանակը գործանած է գետնափոր ուղին:
