Հանրապետութեան նախագահ Ժոզէֆ Աուն վերահաստատեց կառավարութեան յանձնառութիւնը Լիբանանի հողային ամբողջականութեան, յիշեցնելով թէ այդ մասին հաստատուած է Սահմանադրութեան մէջ եւ կը պաշտպանուի լիբանանեան բանակին ջանքերով ու ժողովուրդին կամքով: Պաապտայի պալատին մէջ լիբանանցի տնտեսական գործիչներու պատուիրակութիւն մը ընդունած ատեն Աուն ըսաւ. «Նախագահ ընտրուելէ ետք տուած երդումիս մէջ վերահաստատեցի յանձնառութիւնս Լիբանանի անկախութեան եւ հողային ամբողջականութեան: Կը սխալի ան որ կը խորհի, թէ Լիբանանի պաշտպանութեան համար երկու անգամ երդում կատարած անձը կրնայ ինչ որ պատճառով դրժել իր խոստումը կամ ընդունիլ Լիբանանի շահերուն հակասող առաջարկ»:
