Հանրապետութեան նախագահ Ժոզէֆ Աուն ահազանգեց հարաւային գօտիէն լիբանանեան բանակի բացակայութեան ապահովական վտանգաւոր հետեւանքներէն: Եւրոպացի դեսպաններն ու Եւրոմիութենէն պատուիրակութիւն մը Պաապտայի պալատին մէջ ընդունած ատեն Աուն պահանջեց աջակցիլ Լիբանանի կառավարութեան, որպէսզի կարենայ իր հեղինակութիւնը ամրապնդել երկրի ամբողջ տարածքին եւ պահպանել գերիշխանութիւնը: Ան նաեւ կոչ ուղղեց մշակելու լիբանանեան բանակին զօրակցելու ամբողջական նախագիծ մը եւ չեղարկելու Լիբանանի նկատմամբ սահմանուած եւրոպական որեւէ պատժամիջոց: Աուն լիբանանեան պաշտօնական պատուիրակութիւններու հետ ունեցած տեսակցութիւններուն ընթացքին շեշտեց ներքին միասնականութեան անհրաժեշտութիւնը՝ դէմ դնելու համար բոլոր մարտահրաւէրներուն, որովհետեւ «պառակտուած վիճակով դիւրին պիտի չըլլայ յաղթահարել խնդիրները, որոնք ցցուած են մեր երկրին ու ժողովուրդին դիմաց»: Նախագահը ընդգծեց նաեւ ներքին անվտանգութիւնն ու լիբանանցիներուն խաղաղութիւնը պահպանելու անհրաժեշտութիւնը:
