Նախանցեալ օր Հայաստանի Ազգային ժողովին մէջ տեղի ունեցաւ բախում՝ ընդդիմադիր երեսփոխան Արթիւր Սարգսեանին նկատմամբ հանրային հետապնդում սկսելու համաձայնութեան նիստի ընթացքին: Բախումին մասնակցեցան բազմաթիւ երեսփոխաններ, մինչ ապահովական ուժերը մուտք գործեցին դահլիճ եւ հանդարտեցուցին վիճակը: Իսկ երէկ դատարանը որոշեց երկու ամիս կալանաւորել ընդդիմադիր երեսփոխանը, որուն գործընկերները տեղի ունեցածը համարեցին խայտառակութիւն: Մարդկային իրաւունքներու պաշտպանը յիշեցուց, թէ խորհրդարանը պէտք է ըլլայ ժողովրդավարական քննարկումներու հարթակ, ոչ թէ մարտի դաշտ:
Միւս կողմէ, Ազգային ժողովի փոխնախագահ Ռուբէն Ռուբինեան յայտնեց, թէ Հայաստանի մէջ տեղ չկայ ահաբեկչութեան, ռազմական կամ որեւէ այլ ապօրինի յեղաշրջումի հաամար: «Իշխանութիւնը կը ձեւաւորուի բացառապէս ժողովրդավարական ընտրութիւններով», յիշեցուց Ռուբինեան:
Ինչ կը վերաբերի Ազգային ժողովի երեսփոխաններու հետապնդումին, ապա Քննչական կոմիտէն յայտնեց, թէ ընդդիմադիր երեսփոխան Արծուիկ Մինասեանին մեղադրանք առաջադրուած է պաշտօնական լիազօրութիւնները չարաշահելու չափանիշերով: Իսկ «Հայաստան» խմբակցութեան նախագահ Սէյրան Օհանեան մերժեց ընդունիլ իրեն առաջադրուած մեղադրանքը եւ հրաժարեցաւ մեկնաբանութենէ:
