Սուրիոյ արտաքին գործերու նախարար Ասաատ Շիպանի հրապարակեց նոր որոշում մը, որուն հիմամբ բարեփոխեց արաբներու եւ օտարազգիներու Սուրիա մուտքի վճարները: Ըստ նոր սակագիներուն, Լիբանանի, Յորդանանի, Մալեզիոյ եւ Մորիթանիոյ քաղաքացիները այժմ հնարաւորութիւն ունին Սուրիա մուտք գործել առանց որեւէ վճարումի: Այլ երկիրներու պարագային, Սուրիա այցելողները հնարաւորութիւն ունին ապահովելու մէկ, երեք կամ վեց ամսուայ մուտքի արտօնագիր, իսկ Իրանի քաղաքացիներուն համար արտօնագրին սակագինը 400 տոլար է՝ միայն մէկ ամսուայ համար եւ միայն մէկ այցելութեան:
Այլ գիծի վրայ, Սուրիոյ նախագահ Ահմատ Շարաա ընդունեց Միացեալ Թագաւորութեան արտաքին գործերու նախարար Տէյվիտ Լամին, որ 14 տարիէ ի վեր առաջին անգամ ըլլալով այցելեց Դամասկոս: Բրիտանական կողմը վերահաստատեց աջակցութիւնը Սուրիոյ նոր կառավարութեան, տրամադրելով յաւելեալ մէկ միլիոն սթերլին: Լոնտոն Դամասկոսին տեղեկացուց նաեւ, թէ որոշած է վերականգնել դիւանագիտական յարաբերութիւնները եւ ամրապնդել երկկողմանի կապերը:
Ապահովական առումով, իսրայէլեան բանակը յայտարարեց, թէ գիշերային յատուկ գործողութիւն մը կատարած է Սուրիոյ հարաւային Թել Քոտնա շրջանին մէջ, ուր ձերբակալած է Իրանի յեղափոխական պահակագունդին ցուցմունքներով աշխուժացող բջիջ մը: Ըստ բանակին, անցեալ շաբաթ եղած է նման երկու գործողութիւն:
