Սուրիոյ հարցով ամերիկացի յատուկ պատուիրակ եւ Թուրքիոյ մէջ Միացեալ Նահանգներու դեսպան Թոմ Պարրաք երէկ ժամանեց Պէյրութ, ուր շարք մը տեսակցութիւններ ունեցաւ լիբանանցի պաշտօնատարներու հետ՝ քննարկելու համար Հըզպալլայի ապազինումին վերաբերող պայմաններուն Լիբանանի պատասխանը: Պաապտայի պալատին մէջ Պարրաք տեսակցեցաւ հանրապետութեան նախագահ Ժոզէֆ Աունի հետ, ներկայութեամբ Պէյրութի մէջ Միացեալ Նահանգներու դեսպան Լիսա Ճոնսընի: Զրուցակիցները քննարկեցին տարածաշրջանային ամբողջական լուծումին վերաբերող առաջարկներ:
Պարրաք ժողովէն ետք յայտնեց, թէ «Իսրայէլի, Հըզպալլայի ու լիբանանեան բանակին միջեւ զինադադարէն ետք գործած մեքանիզմը յաջող չէր, իսկ ամերիկեան փաստաթուղթին նկատմամբ լիբանանեան պատասխանը շատ պատասխանատու է»: Անոր համաձայն, Լիբանան պարտաւոր չէ յանձնառութիւն յայտնել ապազինումի որեւէ ժամանակացոյցի, իսկ ամերիկացիները պատրաստ են աջակցելու Պէյրութին: «Իսրայէլ խաղաղութիւն կ’ուզէ Լիբանանի հետ, սակայն այդ իրագործելը մարտահրաւէր մըն է», ըսաւ Պարրաք՝ աւելցնելով, որ այդ ժամանակաշրջանը շատ կարեւոր է Լիբանանին ու տարածաշրջանին համար, ուստի պէտք է օգտուիլ հնարաւորութիւններէն: Խորհրդարանի նախագահ Նեպիհ Պըրրի Այն Թինէի մէջ Պարրաքը ընդունելէ ետք լրագրողներուն յայտնեց, որ դրական զրոյց վարած է, միշտ նկատի առնելով Լիբանանի գերիշխանութեան եւ ազգային շահերուն պահպանումը, ինչպէս նաեւ լիբանանցիներուն՝ ընդ որում Հըզպալլային մտավախութիւնները:
Ան տեսակցեցաւ նաեւ վարչապետ Նաուաֆ Սալամին հետ: Վերջինս Պարրաքին տեղեկացուց, թէ միայն պետութիւնը ունի պատերազմի եւ խաղաղութեան որոշումին իրաւասութիւնը: «Հըզպալլա մաս կը կազմէ պետութեան, իսկ շէյխ Նայիմ Քասէմ յանձնառու կը մնայ զինադադարի համաձայնութեան եւ Թայէֆին», ըսաւ Սալամ:
