28 Յունիս 2025: Այդ օր երեկոյեան Հայ աւետարանական գոլէճը տուաւ իր 98-րդ հունձքը: Եկեղեցական, կրթական եւ համայնքային պատասխանատուներու ներկայութեամբ ու իրենց ծնողաց եւ ուսուցիչներուն ուրախ եւ յուզուած նայուածքներուն դիմաց, ՀԱԳ-ի վեց շրջանաւարտները եկան ամբողջացնելու դպրոցի 1642 շրջանաւարտներու փաղանգը:
Հանդէսը սկսաւ ժամը 8-ին` հանդիսաւոր մուտքով ու շարունակուեցաւ քայլերգերու ունկնդրութեամբ (կենդանի կատարողութեամբ ՀԱԳ լարային եռեակի՝ Անտրիա Տէմիրճեան, Հրակ եւ Գէորգ Պալեաններ), առաջնորդութեամբ եւ ընկերակցութեամբ պարոն Հենրի Իշխանեանի:
Հայ աւետ. առաջին եկեղեցիի հովիւ՝ վերապատուելի Ժիրայր Ղազարեանի աղօթքէն ու տնօրէնին ողջոյնի եւ շնորհակալութեան խօսքէն ետք, օրուան պատգամը յղեց ՀԱԳ 2004-ի շրջանաւարտ, Հայաստանի ամերիկեան համալսարանի Ընդունելութեանց գրասենեակի տնօրէն օրիորդ Մեղրի Խօշեան, որ յիշելէ ետք իր աշակերտական օրերը, մեծ դրուատիքով ու երախտագիտութեամբ անդրադաձաւ դպրոցի ձգած ազդեցութեան՝ իր կեանքին վրայ, ապա շրջանաւարտներուն յղեց կեանքի մէջ յաջողութեան հասնելու կենսական խորհուրդներ:
Աւարտական հանդէսին գեղարուեստական բաժինը կը բաղկանար ասմունքէ՝ «Հոգին հայկական», Ժ. Ս. Յակոբեան (6-րդ դասարանի շրջանաւարտներ Սերենա Հատտատ եւ Հրակ Թերզեան), պարէ՝ «Նազպար» (12-րդի շրջանաւարտներ Սէրլի-Ռոզի Շահինեան եւ Դալար Տագէսեան) եւ նուագէ՝ «Վարդագոյն աղջիկների պարը», «Ղափամա» եւ «Ազգ Փառապանծ» (ՀԱԳ լարային եռեակ):
Վկայականներու եւ մրցանակներու բաշխումէն ետք, յանուն շրջանաւարտներուն իրենց ուղերձը կարդացին Սէրլի-Ռոզի Շահինեան (հայերէն) եւ Արին Պաստաճեան (արաբերէն):
Շրջանաւարտներուն ուղղուած իր հուսկ բանքին մէջ տնօրէն դոկտ. Արմէն Իւրնէշլեան, կեդրոնանալով «խաղաղութիւն» բառին վրան, թելադրեց շրջանաւարտներուն, որ կեանքի մէջ ըլլան խաղաղութեան գործակիցներ:
Գեղեցիկ աւանդութեան համաձայն, 1965 տարուան լիբանանաբնակ չորս շրջանաւարտներ ստացան վեթերան շրջանաւարտի վկայագիր եւ յուշատախտակ՝ ձեռամբ հովիւին եւ հոգաբարձութեան ատենապետ պարոն Ներսէս Պաղտոյեանի:
Վերապատուելի հովիւին առաքելական օրհնութեամբ աւարտեցաւ երեկոյին պաշտօնական մասը, սակայն պահը երկար շարունակուեցաւ հիւրասիրութեան մը ընթացքին:
