Լիբանանահայութիւնը եւս հնարաւորութիւն ունեցաւ պատշաճ կերպով ոգեկոչելու հնչակեան քսան անմահ ղեկավարներու նահատակութեան 110-րդ տարելիցը: Կազմակերպութեամբ Սոցիալ Դեմոկրատ Հնչակեան Կուսակցութեան Լիբանանի շրջանի Վարիչ մարմինին, երէկ երեկոյեան, Սիուֆիի Saints Coeurs վարժարանի սրահին մէջ տեղի ունեցաւ ոգեկոչումի պաշտօնական հանդիսութիւն, ներկայութեամբ հոգեւոր հայրերու, ՍԴՀԿ Կեդրոնական վարչութեան ատենապետ ընկ. Համբիկ Սարաֆեանի, Լիբանանի շրջանի Վարիչ մարմինի ատենապետ ընկ. Վանիկ Տագէսեանի ու անդամներու, կուսակցական պատասխանատուներու, մասնաճիւղերու եւ յարակից միութիւններու վարչութիւններու եւ անդամներու, քոյր կազմակերպութիւններու ներկայացուցիչներու եւ լիբանանահայերու բազմութեան: Գլխաւոր բանախօս ընկ. Համբիկ Սարաֆեանի կողքին, Լիբանանի շրջանի Վարիչ մարմինի խօսքը արտասանեց ընկ. Տագէսեան, մինչ երիտասարդութեան խօսքը փոխանցեց Տխրունի ուս. երիտ. միութեան ատենապետ ընկ. Սեւակ Իզմիրլեան: Տեղի ունեցաւ վաւերագրական տեսերիզի ցուցադրութիւն, իսկ ընկ. Յովիկ Թաֆրանեան եւ Սմբատ Խալաթեան մատուցեցին ազգային յեղափոխական երգեր:
Ոգեկոչումի հանդիսութեան ամբողջական թղթակցութիւնը՝ յաջորդիւ:
