Հովանաւորութեամբ Սուրիոյ Հարաւային շրջանի Վարիչ մարմինի, 20 Յունիս 2025-ին, առաւօտեան ժամը 10:30-ին, մեծ շուքով յիշատակուեցաւ «Քսան հնչակեան ռահվիրաներու» ոգեկոչումը՝ Դամասկոսի Ս. Սարգիս առաջնորդանիստ եկեղեցւոյ մէջ հոգեհանգստեան կարգով, ապա՝ Ապրիլեան յուշարձանին առջեւ:
Հոգեհանգստեան կարգը կատարուեցաւ Թեմիս բարեջան առաջնորդ Տէր Արմաշ եպս. Նալպանտեանի առաջնորդութեամբ: Ապրիլեան յուշարձանին առջեւ Քսաններուն պատգամը փոխանցեց Ս.Դ.Հ.Կ.-ի Կեդրոնական վարչութեան անդամ, ընկեր տոքթոր Վազգէն Համալեանը:
Ոգեկոչման արարողութիւններուն ներկայ էին նաեւ Ս.Դ.Հ.Կ.-ի Սուրիոյ Հարաւային շրջանի Վարիչ մարմինի ատենապետ՝ ընկ. Խորէն Չարքեանը եւ վարիչ մարմինի ընկերները, Հ.Մ.Մ.-ի Կեդրոնական վարչութեան ատենադպիր՝ ընկեր Անդրանիկ Մարաշլեանը, վեթերան եւ շարքային ընկերներ, Հ.Մ.Մ.-ականներ, սկաուտական փողերախումբը, համակիրներ եւ դամասկահայ հաւատացեալներ:
Հ.Մ.Մ.-ի փողերախումբը իր մասնակցութիւնը բերաւ նուագելով փունջ մը ազգային եւ յեղափոխական երգեր։
