Սուրիոյ նախագահ Ահմատ Շարաա ցաւակցեցաւ Դամասկոսի Տուէյլհա թաղամասի Մար Էլիաս եկեղեցւոյ մէջ տեղի ունեցած եւ բոլոր սուրիացիները ցնցած ոճրային գործողութեան զոհերու հարազատներուն եւ բարի ապաքինում մաղթեց վիրաւորներուն: Շարաա յայտարարութեամբ մը նշեց, թէ կրօնական կառոյցի մը մէջ անմեղներ թիրախաւորած այս անարգ ոճիրը կը վերյիշեցնէ կառավարութեան եւ ժողովուրդին միասնականութեան կարեւորութիւնը՝ դիմակայելու համար հայրենիքի անվտանգութեան ու կայունութեան դէմ ցցուած վտանգները: «Այսօր միասին կը դատապարտենք ոճրագործութիւնը եւ անարդարութիւնը, խոստանալով գիշեր-ցերեկ աշխատիլ՝ յայտնաբերելու համար բոլոր անոնք, որոնք ծրագրեցին ու մասնակցեցան այս ոճիրի գործադրութեան, որպէսզի ստանան իրենց արդար պատիժը», ըսաւ նախագահը: Իսկ Սուրիոյ Առողջապահութեան նախարարութիւնը յայտարարեց, թէ նախանցեալ օր Մար Էլիաս եկեղեցին թիրախաւորած ահաբեկչական գործողութեան զոհերուն թիւը բարձրացած է առնուազն 25-ի, իսկ վիրաւորներունը՝ 63-ի: Ներքին գործերու նախարարութիւնը Կիրակի երեկոյեան յայտարարեց, թէ ՏԱՀԷՇ-էն ահաբեկիչ մը կրակ բացած է եկեղեցւոյ մէջ, ապա պայթեցուցած ականուած գօտին՝ աւեր գործելով եկեղեցւոյ մէջ: Ըստ յայտարարութեան, առնչակից մարմինները բացած են հետաքննութիւն՝ բացայայտելու ոճիրին ծալքերը եւ պահպանելու ազգային խաղաղութիւնը, շեշտելով միասնականութեան կարեւորութիւնը՝ դէմ դնելու երկրին կայունութիւնն ու ապահովութիւնը վտանգողներուն:
