Իրանի մէջ գործող ՄԱԿ-ի փաստահաւաք խումբը չբացառեց, որ իսրայէլեան յարձակումները խախտած ըլլան միջազգային օրէնքը՝ պատճառելով քաղաքացիական կորուստներ: Իսկ Հիւլէական ուժանիւթի միջազգային գործակալութեան մէջ Իրանի ներկայացուցիչը յայտնեց, թէ հիւլէակայաններուն ռմբակոծումը պիտի պատճառէ կենսոլորտային ահաւոր վնաս: Գործակալութեան տնօրէն Ռաֆայէլ Կրոսի իր կարգին նշեց, թէ Իրան 13 Յունիսին տեղեկացուցած էր, որ քայլերու կը ձեռնարկէ պաշտպանելու հիւլէական նիւթերը:
Քաղաքական առումով, Իրանի արտաքին գործերու նախարար Ապպաս Արաղճի Մոսկուայի մէջ տեսակցեցաւ Ռուսիոյ նախագահ Վլատիմիր Փութինի հետ ու յայտնեց, թէ տարածաշրջանին մէջ իսրայէլեան գործողութիւններուն հետեւանքները կը յառաջացնեն զոյց երկիրներուն մտահոգութիւնը: Քրեմլին իր կարգին դատապարտեց Իրանի հիւլէական կառոյցներուն ռմբակոծումը եւ մտահոգութիւն յայտնեց, որ յարձակումին հետեւանքները տակաւին չեն արժեւորուած: «Իրանին ռուսական աջակցութիւնը կախեալ է Թեհրանի կարիքներէն եւ մենք կը փորձենք միջնորդական ջանք թափել», նշուեցաւ Քրեմլինի յայտարարութեան մէջ:
Իսրայէլ-Իրան պատերազմի շարունակութեան լոյսին տակ, շատ կը խօսուի քարիւղի համաշխարհային գիներու կտրուկ աճի հաւանականութեան մասին: Միացեալ Նահանգներու նախագահ Տոնըլտ Թրամփ սակայն զգուշացուց նման քայլէ մը ու շեշտեց, թէ մօտէն կը հետեւի իրավիճակին ու «բոլորը պարտին ցած պահել քարիւղի սակագիները»:
