Իսրայէլ-Իրան պատերազմը Կիրակի արեւածագին ապրեցաւ մեծ ցնցում մը, երբ ամերիկեան «B-2» ռազմավարական ռմբակոծիչները իրենց ծանր ռումբերը տեղացուցին հիւլէական կայաններուն վրայ՝ ներառեալ լաւապէս պաշտպանուած Ֆորտոն: Միացեալ Նահանգներու նախագահ Տոնըլտ Թրամփ յայտնեց, թէ «կործանում եզրը կը համարուի Իրանի հիւլէակայաններուն մէջ տեղի ունեցածը ճշգրտօրէն նկարագրող բառ մը:»
Ամերիկեան հարուածներուն զուգահեռ, շարունակուեցան նաեւ իսրայէլեան օդային գրոհերը, որոնք երէկ կեդրոնացան մայրաքաղաք Թեհրանի վրայ, հարուածելով զինուորական կառոյցներ եւ ելեկտրականութեան ցանցը, որուն պատճառով մայրաքաղաքի բնակչութիւնը քանի մը ժամ մատնուեցաւ խաւարի: Իսրայէլեան բանակը յայտարարեց, թէ ընդամէնը երկու ժամուան ընթացքին գործած է հարիւր հարուած, իսկ պաշտպանութեան նախարար Իսրայէլ Քաց յայտնեց, թէ ռմբակոծումի ենթարկուած է իրանեան Պասիճի կեդրոնատեղին, յեղափոխական պահակագունդի ներքին անվտանգութեան կեդրոնը եւ Էվին բանտը, որ կը համարուի Իրանի ամէնէն տխրահռչակ արգելավայրերէն մէկը:
Իսրայէլեան բանակի բանբեր Աւիխայ Ատրուհի նշեց, թէ վեց օդակայան ռմբակոծած են Իրանի կեդրոնական, արեւելեան եւ արեւմտեան հատուածներուն մէջ, Թեհրանի բնակչութեան կոչ ուղղելով հեռու մնալու զէնք արտադրող գործարաններէն եւ զինուորական կէտերէն, որոնք յառաջիկայ օրերուն պիտի շարունակեն դառնալ օդային յարձակումներու թիրախ:
