Հակառակ պատերազմին վերջ տալու, անոր ընդարձակումը կանխելու եւ բանակցային սեղան վերադառնալու միջազգային բազում կոչերուն, իրավիճակը խիստ լարուած կը մնայ Իրանի եւ Իսրայէլի մէջ՝ փոխադարձ հրթիռարձակումներու եւ ռազմատենչ յայտարարութիւններու լոյսին տակ:
Իսրայէլեան բանակի բանբերը յայտնեց, թէ ռազմական օդանաւերը կը շարունակեն թիրախաւորել Իրանի հիւլէական եւ հրթիռային կառոյցները: Երէկ, իսրայէլեան ռազմական աւելի քան 50 օդանաւեր սաւառնած են Իրանի վերեւ եւ բազմաթիւ թիրախներ հարուածած՝ ընդ որում մայրաքաղաք Թեհրանի մէջ: Բանբերին համաձայն, Իրան տակաւին զինամթերանոցներուն մէջ ունի հազարաւոր հրթիռներ եւ յստակ չէ, թէ ինչու նուազեցուցած է արձակած հրթիռներուն թիւը, բաղդատած առճակատումի առաջին օրերուն հետ:
Միւս կողմէ, Իրանի յեղափոխական պահակագունդը յայտարարեց, թէ հրթիռարձակումի 11-րդ ալիքին մէջ առաջին անգամ ըլլալով գործածած է հեռահար «Ֆաթէհ» հրթիռը, որ յաջողած է խուսափիլ իսրայէլեան հակահրթիռային պաշտպանութեան բոլոր համակարգերէն եւ ցնցել ապաստարանները: «Մեր հրթիռներով ցոյց տուինք, թէ ամբողջովին կը տիրապետենք իսրայէլեան օդային տարածքին», յայտարարեց պահակագունդը: Իրանի զինուած ուժերու սպայակոյտի պետ Ամիր Մուսաուի Թել Աւիւի եւ Հայֆայի բնակչութեան խորհուրդ տուաւ հեռանալ եւ խնայիլ իրենց կեանքը: Իսրայէլի Առողջապահութեան նախարարութիւնը յայտարարեց, թէ Իրանէն արձակուած հեռահար հրթիռներուն հետեւանքով երէկ 94 վիրաւոր եւս փոխադրուած է հիւանդանոց:
Իսրայէլի վարչապետ Պենիամին Նեթանիահու շեշտեց, թէ իրենք 5 օրուան ընթացքին տապալած են ռազմական հաւասարակշռութիւնը, խոստանալով «յանգիլ բոլորովին տարբեր Միջին Արեւելքի մը, որ նախապէս երբեք գոյութիւն չէ ունեցած»:
Իսրայէլի պաշտպանութեան նախարար Իսրայէլ Քաց յայտնեց, թէ ռազմական օդանաւերը կործանած են Իրանի ներքին ապահովութեան ուժերու կեդրոնատեղին: «Պիտի շարունակենք թիրախաւորել Իրանի պետական անձնաւորութիւնները, ուր որ ալ ըլլան անոնք», ըսաւ Քաց: Իսրայէլեան հրթիռները հասած են նաեւ Թեհրանի Կարմիր մահիկի կեդրոնատեղին ու զայն կործանած:
Միացեալ Նահանգներու նախագահ Տոնըլտ Թրամփ յայտնեց, թէ յառաջիկայ շաբաթը վճռորոշ պիտի ըլլայ Իրանի հիւլէական թղթածրարին առնչութեամբ: «Գուցէ հարուածեմ կամ չհարուածեմ Իրանի հիւլէական կառոցները», ըսաւ Թրամփ, դիտել տալով, որ Թեհրան ուշացաւ բանակցելու, սակայն տակաւին հնարաւորութիւն կայ վերջ տալու պատերազմին եւ գտնելու խաղաղ լուծում: «Իրան հակաօդային պաշտպանութիւն այլեւս չունի եւ չեմ գիտեր, թէ մինչեւ երբ կրնան տոկալ», կարծիք յայտնեց ամերիկացի նախագահը: Ան սակայն զգուշացուց, թէ համբերութիւնը սկսած է սպառիլ, վստահեցնելով որ գիտեն Ալի Խամինէիի թաքստոցը, սակայն առայժմ չեն ուզեր զայն ահաբեկել:
Իսկ պաշտպանութեան նախարարը յայտնեց, թէ 26 միլիառ տոլար յատկացուցած են հիւլէական կարողութիւնները ամրապնդելու համար, որպէսզի Միացեալ Նահանգներ մնայ աշխարհի ուժեղագոյնը:
Միւս կողմէ, Իրանի իսլամական յեղափոխութեան հոգեւոր գերագոյն առաջնորդ Ալի Խամինէի յայտնեց, թէ Իրանի ժողովուրդը կը մերժէ խոնարհիլ ու յանձնուիլ, այլ պիտի շարունակէ դիմակայել, ծանր պատիժ տալով Իսրայէլին: Խօսելով ամերիկեան հաւանական միջամտութեան մասին, Խամինէի ըսաւ. «Թրամփի սպառնալիքները զաւեշտալի են: Եթէ ամերիկացիները զինուորականօրէն միջամտեն, ապա պիտի մատնուին այնպիսի պարտութեան մը, որ կարելի չէ հատուցել», շեշտեց ան: Խամինէի յայտարարեց «Հայտար էլ-Ժապպար» խորագրեալ ճակատամարտի բացումը, շեշտելով թէ բռնութեամբ պէտք է վարուիլ իսրայէլեան ահաբեկչութեան նկատմամբ:
