Հայաստանի մէջ յաճախ կը կրկնուին կազի արտահոսքէ յառաջացած մահացու պայթումները: Նորագոյնը տեղի ունեցաւ երէկ՝ Գեղարքունիք գաւառի Ճամբարակ քաղաքին մէջ, ուր, նախնական տուեալներով, կազի արտահոսքի պատճառով տեղի ունեցած պայթումէն փլուզուեցաւ կառոյց մը: Ըստ տարածքային կառավարումի եւ ենթակառոյցներու նախարար Դաւիթ Խուտաթեանին, պայթումին պատճառով զոհուած է առնուազն չորս մարդ, վիրաւորուած են 12 ուրիշներ: Նախարարը խոստացաւ անյապաղ օգնութիւն ցուցաբերել, որպէսզի քաղաքացիները չմնան անապաստան:
