Վերջին շրջանին իսրայէլեան ոտնձգութիւններուն աճէն ետք իրավիճակը տակաւին չէ բնականոնացած հարաւային գօտիին եւ Պէյրութի հարաւային արուարձաններուն մէջ: Շուրջ 50 զինուորներէ բաղկացած իսրայէլեան խումբ մը երէկ ներթափանցեց Քֆարքիլայի ուղղութեամբ, ապա որոշ ժամանակ ետք նահանջեց, սահմանային որոշ աշխատանքներու իրականացումէն ետք:
Լիբանանեան բանակէն շրջուն ջոկատ մը երէկ այցելեց Պէյրութի հարաւային արուարձաններու Սէն Թէրէզ շրջանը՝ ստուգելու համար շէնք մը, որ նախապէս յարձակումի ենթարկուած էր վերջին պատերազմին ընթացքին: Նոյն շրջանին մէջ, երէկ շէնք մը փլուզուեցաւ Ապտ էլ Նուր փողոցին վրայ՝ վերջին պատերազմին ընթացքին թիրախաւորումէն կրած ծանր վնասներուն պատճառով:
