Անցեալ Հինգշաբթի օր Պէյրութի հարաւային արուարձաններուն մէջ շարք մը դիրքերու ռմբակոծումէն ետք, իսրայէլեան ռազմական օդանաւերը եւ անօդաչու սարքերը շաբաթավերջին շարունակեցին սաւառնիլ Պէյրութի հարաւային արուարձաններուն վերեւ: Կիրակի օր, զինադադարին հետեւող միջազգային յանձնախումբը լիբանանեան բանակէն պահանջեց խուզարկել հարաւային արուարձաններու Մրէյժէ շրջանի շէնքերէն մէկը եւ ստուգել, թէ կառոյցը Հըզպալլային կողմէ կը գործածուի զէնք արտադրելու եւ մթերելու համար: Կարճ ժամանակ ետք լիբանանեան բանակը յայտարարեց, թէ այցելած է նշեալ վայրը եւ որեւէ զէնք չէ գտած շէնքին մէջ:
Իսրայէլեան լրատուամիջոցներ հաղորդեցին, թէ ի տես Իրանէն զինամատակարարումի գիծերու խափանումին, Հըզպալլա սկսած է Լիբանանի մէջ արտադրել անօդաչու սարքեր՝ օգտուելով ուքրանական փորձառութենէն, մանաւանդ որ նման սարքերու արտադրութիւնը աւելի դիւրին է հրթիռներու եւ այլ զէնքերու արտադրութենէն եւ այդ կարելի է իրականացնել հակառակ տարածաշրջանային ճնշումներուն:
Լիբանանեան բանակի հրամանատարութիւնը երէկ յայտարարեց, թէ անցեալ Կիրակի օր իսրայէլեան երկու անօդաչու սարք ջախջախուած է հարաւարեւելեան Հուլայի եւ հարաւարեւմտեան Պէյթ Լիֆ գիւղերուն մէջ, առանց պատճառելու մարդկային կորուստ կամ նիւթական վնաս: Լիբանանեան բանակը անյապաղ ուղղուած է ջախջախումի վայրեր եւ սարքերը փոխադրած ապահով վայր, զանոնք քննելու նպատակով:
