Իւրաքանչիւր ամռան սեմին, լիբանանեան զանազան շրջաններու մէջ վերստին կը ցցուի աղբահանութեան ճգնաժամի վտանգը, մանաւանդ այն շրջաններուն մէջ, ուր կը գործեն օրինական կամ ապօրինի աղբավայրեր: Այս ծիրին մէջ, ծանօթ Գոսթա Պրաւայի աղբանոցը հիւրընկալող Շուէյֆաթի քաղաքապետութիւնը սպառնաց դիմել մագլցողական քայլերու եւ նոյնիսկ փակել աղբանոցը, եթէ կառավարութիւնը չսրբագրէ նախարարաց նախորդ խորհուրդներուն սխալը եւ Շուէյֆաթին չյատկացնէ 2016-ին խոստացուած յատկացումները: Յայտարարութիւնը յիշեցուց, թէ այս աղբանոցը վնաս կը պատճառէ ոչ միայն Շուէյֆաթի մէջ ապրող աւելի քան 600 հազար մարդոց, այլեւ Լիբանանին եւ ամբողջ Միջերկրականի շրջանին, մաղթելով որ հանրապետութեան նախագահ Ժոզէֆ Աունի իշխանութեան օրերուն իւրաքանչիւրը ստանայ իր արդար իրաւունքը:
