Ուքրանիոյ դէմ Ռուսիոյ պատերազմը երէկ ականատես դարձաւ անակնկալ եւ աննախադէպ զարգացումներու, որոնք կրնան առաջնորդել յաւելեալ մագլցումի, կործանումի եւ զոհերու: Պատերազմի սկիզբէն ի վեր գուցէ մեծագոյն եւ ամենէն յաջող յարձակումով, ուքրանական հետախուզական ծառայութիւնները աւելի քան 110 թռչող սարքով ռուսական օդային խարիսխներ հարուածեցին Ուքրանիոյ հետ սահմանային գօտիէն: Ուքրանական լարուած անօդաչուներուն ալիքը հասաւ մինչեւ Սիպերիոյ շրջանին մէջ գործող զինուորական ռազմակայանները, ուր կործանեցին օդակայաններուն մէջ կայանուած քանի մը տասնեակ կործանիչներ՝ ներառեալ Ռուսիոյ ռազմավարական հեռահար «Անթոնով» եւ «Թուփոլեւ» տիպի ռազմական օդանաւեր, որոնք հրկիզուեցան առանց օդ իսկ բարձրանալու: Ռուսիոյ Պաշտպանութեան նախարարութիւնը իր կարգին յայտարարեց ուքրանական սարքերով յարձակում մը ձախողութեան մատնելու մասին:
Զինուորական մագլցումին զուգահեռ, Թուրքիոյ իշխանութիւններուն միջնորդութեամբ, երէկ Իսթանպուլի մէջ կազմակերպուեցաւ ռուս-ուքրանական բանակցային նիստ, որ տեւեց աւելի քան ժամ մը, սակայն աւարտին որեւէ պաշտօնական յայտարարութիւն չհրապարակուեցաւ: Թուրքիոյ Արտաքին գործերու նախարարութիւնը յայտարարեց միայն, որ «նիստին ընթացքը վատ չէ եղած»:
Կը քննարկուին նաեւ Իրանի հարցով բանակցութիւններու հոլովոյթը շարունակելու հնարաւորութիւնները: Իրանցի բարձրաստիճան դիւանագէտ մը «Ռոյթըրզ» գործակալութեան յայտնեց, որ Թեհրան կը մտադրէ մերժել լուծումի ամերիկեան առջարկները, որովհետեւ կ’անտեսեն Իրանի շահերը, ուստի անգործադրելի են: Իրանի Արտաքին գործերու նախարարութիւնը ահազանգեց, թէ կարելի պիտի չըլլայ համաձայնիլ, եթէ Արեւմուտքին նպատակն է Իրանը զրկել հիւլէական խաղաղ ուժանիւթէն օգտուելու հնարաւորութենէն:
