Ուրախութեամբ կը տեղեկացնենք, թէ Հայաստանի Հանրապետութեան մէջ Ուրուկուէյի Հանրապետութեան նորանշանակ դեսպանը ՝ տիկին Սիլվանա Լեսկա Պարոլին, պաշտօնապէս հաւատարմագրուեցաւ եւ սկսաւ իր դիւանագիտական առաքելութիւնը Երեւանի մէջ։
Հաւատարմագրութեան արարողութիւնը տեղի ունեցաւ Հայաստանի Հանրապետութեան նախագահի նստավայրին մէջ, ուր դեսպան Լեսկան իր նամակները յանձնեց նախագահ Վահագն Խաչատուրեանին։
Հանդիպման ընթացքին, նախագահ Խաչատուրեան ընդգծեց, որ Հայաստանը եւ Ուրուկուէյը մշտապէս պահպանած են բարեկամական յարաբերութիւններ՝ հիմնուած փոխադարձ յարգանքի եւ փոխըմբռնման վրայ։ Ան շեշտեց նաեւ երկու երկիրներուն միջեւ յարաբերութիւններու խորացման եւ բազմաճիւղ համագործակցութեան ընդլայնման մեծ ներուժը։
Իր կարգին, դեսպան Լեսկան յայտնեց իր ուրախութիւնը՝ Հայաստանի մէջ սոյն առաքելութիւնը ստանձնելու համար, եւ իր խանդավառութիւնը՝ գործնական մասնակցութիւն բերելու երկու ժողովուրդներու միջեւ կապերու սերտացման եւ ընդլայնման։
Հանդիպման ընթացքին անդրադարձ կատարուեցաւ նաեւ տնտեսական յարաբերութիւններու խթանման անհրաժեշտութեան, ինչպէս նաեւ նոր ձեւաչափերու մշակման համագործակցութեան կարեւորութեան։ Յատուկ ընդգծուեցաւ նաեւ տեղեկատուական եւ ստեղծագործական արհեստագիտութիւններու զարգացման կարեւորութիւնը։
Քննարկուեցաւ Ուրուկուէյի մէջ «Թումօ» ստեղծարար արհեստագիտական կեդրոն մը հիմնելու հնարաւորութիւնը, ինչպէս նաեւ Հայաստանի մէջ Ուրուկուէյի «Plan Ceibal» ծրագիրի մասնաճիւղի մը հիմնումը։
Հանդիպման օրակարգերուն մաս կազմեց նաեւ 2026 թուականին Երեւանի մէջ նախատեսուած ՄԱԿ-ի կենսաբազմազանութեան գագաթաժողովին (COP-15) առնչուող շարք մը հարցերու քննարկումը։ Երկու կողմերն ալ համաձայնեցան, թէ պէտք է ձեւաւորել համատեղ դիրքորոշումներ եւ ամրապնդել փոխյարաբերական գործակցութիւնը։
Սոյն դիւանագիտական նշանակումը նոր եւ նշանակալի քայլ մըն է՝ նոր հորիզոններ բանալով Ուրուկուէյի եւ Հայաստանի միջեւ մշակութային, արհեստագիտական եւ դիւանագիտական փոխանակումներու յարաբերութիւններուն մէջ։ Ան կը ներկայացնէ իսկական ձեռքբերում մը երկու բարեկամ ժողովուրդներուն համար։
