Հանրապետութեան նախագահ Ժոզէֆ Աուն յայտնեց, որ Լիբանան ապաստանած սուրիացի տեղահանուածներուն թղթածրարին լուծումը կը համարուի առաջնահերթութիւն, աւելցնելով որ այս հարցը կ’արծարծուի Դամասկոսի իշխանութիւններուն հետ, մանաւանդ Սուրիոյ նկատմամբ սահմանուած ամերիկեան պատժամիջոցներու չեղարկումի լոյսին տակ: Սուրիոյ հարցով ՄԱԿ-ի յատուկ պատուիրակ Կիր Փետըրսընին եւ Լիբանանի մէջ ՄԱԿ-ի յատուկ համակարգողին հետ Պաապտայի մէջ ունեցած տեսակցութեան ընթացքին Աուն անդրադարձաւ նաեւ հարաւի վիճակին եւ ահազանգեց, որ սահմանային բռնագրաւեալ հինգ բլուրներէն չնահանջելով եւ իր բռնարարքները շարունակելով, Իսրայէլ կը դժուարացնէ լիբանանեան բանակին տեղակայումը մինչեւ սահման: Անոր համաձայն, Պէյրութ կը շարունակէ հաղորդակցութիւնները արաբական եւ միջազգային կողմերուն հետ՝ հասնելու համար զինադադարի համաձայնութեան ամբողջական գործադրութեան:
