Լիբանանեան հարաւային գիւղերուն մէջ մերթ ընդ մերթ կը շարունակուին խնդիրները տեղի բնակիչներուն եւ ԵՈՒՆԻՖԻԼ-ի խաղաղապահ ուժերուն միջեւ: Նորագոյնը երէկ պատահեցաւ Եաթէրի մէջ, ուր քաղաքացիական տարազով խումբ մը տղամարդիկ խոչընդոտեցին գիւղին մէջ երթեւեկող խաղաղապահներուն ինքնաշարժները: ԵՈՒՆԻՖԻԼ-ի բանբեր Անտրէա Թենենտի յայտնեց, որ խաղաղապահները զէնք չեն պարզած գիւղացիներուն դէմ, այլ պարզապէս կը կատարէին լիբանանեան բանակին հետ համակարգուած դիտարկում:
Լիբանանեան բանակի հրամանատարութիւնը իր կարգին հաղորդագրութեամբ մը յայտարարեց, թէ հարաւային Պլիտա եւ Մէյս էլ-Ժապալ գիւղերու շրջանին մէջ վերացուցած է իսրայէլեան հողակոյտերը եւ լրտես սարքաւորումները:
