Վարչապետ Նաուաֆ Սալամ Ապու Տապիի մէջ տեսակցեցաւ Արաբական Միացեալ Էմիութիւններու նախագահ Մոհամմատ պըն Զայէտ ալ-Նահիանի հետ, քննարկեց երկկողմանի եղբայրական յարաբերութիւնները եւ համագործակցութեան զարգացումի հեռանկարները: Էմիրաթցի նախագահը յայտնեց, որ Լիբանանի նկատմամբ իր երկրին դիրքորոշումները անփոփոխ են ու Ապու Տապի կը յարգէ Լիբանանի գերիշխանութիւնն ու հողային ամբողջականութիւնը: Սալամ շեշտեց, որ այժմ կան արաբական համագործակցութեան նոր հորիզոններ, իսկ Լիբանանի դռները այսուհետեւ բաց են բոլոր արաբ եղբայրական ժողովուրդներուն դիմաց», վստահեցուց Նաուաֆ Սալամ: Էմիրութիւններու լիբանանեան գաղութին հետ ունեցած տեսակցութեան ընթացքին Սալամ նշեց, որ հարաւային բլուրներու իսրայէլեան բռնագրաւումը կ’ուշացնէ լիբանանեան բոլոր հողերուն վրայ պետութեան հեղինակութիւնը պարտադրելու ծրագրին գործադրութիւնը: «Մենք յանձնառու կը մնանք բարեկարգումներու եւ գերիշխանութեան պահպանումի ծրագրերուն», ըսաւ Սալամ՝ շեշտելով, որ աշխատանք կը տարուի լիբանանցիներուն եւ օտարերկրացիներուն վստահութեան վերատիրանալու, որպէսզի կարելի ըլլայ ներգրաւել ներդրումներ:
Վարչապետին շուտով հակադարձեց Հըզպալլայի արբանեակներէն մուֆթի Ահմատ Քապալանը, որ շեշտեց, թէ Սալամ վարչապետ պիտի չկարենար դառնալ առանց իսլամական յեղափոխութեան կողմէ Հըզպալլային տրամադրուած աջակցութեան, որուն շնորհիւ կարելի եղաւ ազատագրել Լիբանանը: «Դիմադրութեան զէնքէն աւելի բարձր օրինականութիւն չկայ: Երբ լիբանանեան բանակը տիրանայ արդիական օդանաւերու եւ հակաօդային պաշտպանութեան համակարգերու, այն ատեն կը սկսինք քննարկել Դիմադրութեան զէնքին թղթածրարը», պնդեց Քապալան, Սալամէն պահանջելով զերծ մնալ նման կեցուածքներէ ներքին հարցեր յառաջացնելէ:
