Հանրապետութեան նախագահ Ժոզէֆ Աուն յայտնեց, որ Յունիսի կիսուն աշխատանքները պիտի սկսին՝ Պէյրութի պաղեստինեան երեք գաղթակայաններու մէջ ապօրինի զէնքին հարցը լուծելու ուղղութեամբ: Ամերիկացի ծերակուտական պատուիրակութիւն մը ընդունած ատեն Աուն դրական համարեց Սուրիոյ նկատմամբ սահմանուած պատժամիջոցները չեղարկելու որոշումը, որովհետեւ այդ կրկայ բարելաւել տնտեսութիւնը եւ ապահովել տեղահանուած սուրիացիներուն տունդարձը: Նախագահը ՄԱԿ-ին վերստին առաջարկեց սուրիացիներուն օգնել իրենց երկրին մէջ, ոչ թէ Լիբանանի: Ան ապա տեսակցեցաւ Ֆինլանտայի արտաքին գործերու նախարար Էլինա Վալթոնէնին հետ ու Լիբանանի յանձնառութիւնը յայտնեց ԵՈՒՆԻՖԻԼ-ի խաղաղապահ ուժերու առաքելութեան եւ անոնց հետ լիբանանեան բանակի համագործակցութեան:
Աուն Պաապտայի մէջ ընդունեց Հըզպալլայի «Հաւատարմութիւն Դիմադրութեան» խորհրդարանական խմբակցութիւնը ներկայացնող պատուիրակութիւն մը: Խմբակցութեան նախագահ Մոհամմատ Ռաատ յայտնեց, որ նախագահին հետ միտքեր փոխանակած են երկրին առջեւ ցցուած մարտահրաւէրներուն եւ առաջնահերթութիւններուն մասին, առաջին հերթին ընդգծելով Լիբանանի գերիշխանութիւնը պահպանելու, իսրայէլեան բռնագրաւումին վերջ տալու եւ ոտնձգութիւնները կանխելու կարեւորութիւնը: «Նախագահին հետ ունինք համախոհութեան լայն հնարաւորութիւն եւ պարտաւորուած չենք որեւէ պայմանաժամով», ըսաւ Ռաատ: Իսկ Այն Թինէի մէջ խորհրդարանի նախագահ Նեպիհ Պըրրիին հետ տեսակցելէ ետք Ռաատ յայտնեց, որ քաղաքապետական ընտրութիւններուն արդիւնքները ցոյց կու տան, որ ժողովուրդը յանձնառու կը մնայ դիմադրութեան ընտրանքին:
