Վարչապետ Նաուաֆ Սալամ յայտնեց, թէ կարելի չէ լուռ մնալ պետութեան տիրապետութենէն դուրս մնացող զէնքի հարցին մասին: «Աւարտեցաւ Իրանի յեղափոխութիւնը արտածելու ժամանակաշրջանը», շեշտեց վարչապետը, ահազանգելով որ պաղեստինեան գաղթակայաններուն մէջ առկայ զէնքը կրնայ օրին մէկը դառնալ ներ-պաղեստինեան առճակատումի միջոց: Շեշտելով, որ ըլլալով խաղաղասէր, լիբանանցիները կը պահանջեն արդար ու մնայուն խաղաղութիւն: Սալամ ամերիկացիներուն կոչ ուղղեց յաւելեալ ճնշում բանեցնելու Թել Աւիւի նկատմամբ, որպէսզի իսրայէլեան ուժերը հեռանան Լիբանանի բռնագրաւեալ հողերէն: Ամերիկեան ծերակուտականներու պատուիրակութիւն մը ընդունած ատեն, վարչապետը հաւաստիացուց, որ կառավարութիւնը աշխատանք կը տանի Լիբանանը վերակառուցելու ծրագրեր մշակելու եւ ֆինանսաւորում ապահովելու: Ան նշեց, թէ մշակուած է պաղեստինեան գաղթակայաններուն վիճակը բարեկարգելու ծրագիր մը եւ կառավարութիւնը զայն պիտի գործադրէ աստիճանաբար: Ապու Տապիի բարգաւաճումի հիմնադրամի պատուիրակութիւնը ընդունելէ ետք Սալամ հաստատեց, որ Լիբանան յստակ որոշում կայացուցած է արաբական երկիրներուն ծոցը վերադառնալու մասին: Էմիրաթական պատուիրակութեան բանբերը, իր կարգին, յայտնեց, որ նախաձեռնութիւններ կը մշակուին լիբանանցիներուն համար եւ սեփական ոլորտին վերականգնումին ուղղութեամբ: «Լիբանան եկած ենք աջակցելու կառավարութեան եւ պիտի կեդրոնանանք առաջնահերթ ոլորտներուն վրայ», նշեց հիւր պատուիրակութիւնը:
