Երէկ առաւօտեան, Նոր Հաճնոյ ՀԿԲՄ-ի դարմանատուն այցելեց «Գլարա Մարկոսեան» հիմնադրամի տնօրէն տոքթ. Վարուժ Ալթըպարմաքեանը, ընկերակցութեամբ տիար Հրայր Տանձիկեանի եւ Ս. Էջմիածնի կրօնասէր տիկնանց համախմբումի վարչական տիկ. Յասմիկ Տեմիրճեանի: Զանոնք հիւրընկալեցին Սուրբ Գէորգ եկեղեցւոյ հոգեւոր հովիւ Տէր Նարեկ քհնյ. Հեճինեան, դարմանատան տնօրէնուհի Քաթիա Պոյաճեան, ՍԴՀԿ Վարիչ մարմինը ներկայացնող ընկերներ տոքթ. Մարտիկ Ժամկոչեան եւ տոքթ. Սարգիս Պետիկեան, Հաճնոյ Հայրենակցական Միութեան ատենապետ ընկ. Փօլ Եագուպեան, «Արարատ»-ի տնօրէն ընկ. Նազօ Ճէրէճեան, ՀԿԲՄ-ի վարչական եւ Ազգային խորհուրդի անդամ տիար Կիրակոս Տօնիկեան եւ եկեղեցւոյ տիկնանց յանձնախումբի ատենապետուհի ընկ.հի Նորա Սարաֆեան:
Տոքթ. Ալթըպարմաքեան շեշտեց, թէ շրջանը իր սրտին մօտիկ է, որովհետեւ պատանեկութեան մէկ մասը ապրած է այնտեղ: Տէր Հայրը երախտագիտութիւն յայտնեց բարերարին՝ իր անմիջական աջակցութեան համար, մանաւանդ նաւահանգիստի պայթումէն ետք: Բարերարը իր կարգին բացատրեց, թէ քանի մը տարի առաջ դարմանատան անգործունեայ վիճակը անընդունելի էր իրեն համար, ուստի յատկացումներ կատարած էր, որպէսզի շարունակուի կարիքաւորներուն բժշկական անհրաժեշտ ծառայութիւններուն մատուցումը:
Դարմանատան տնօրէնուհին ապա ներկայացուց աշխատանքային իրավիճակը, մինչ ընկ. տոքթ. Ժամկոչեան երախտագիտական յուշանուէրներ յանձնեց տոքթ. Ալթըպարմաքեանին ու Ս. Էջմիածնի կրօնասէր տիկնանց համախմբումի ատենապետուհի տիկ. Անահիտ Տանձիկեանին, որ ստանձնեց տիկ. Յասմիկ Տեմիրճեանը: Տոքթ. Ալթըպարմաքեան ապա շրջեցաւ դարմանատան մէջ եւ գնահատեց այնտեղ իրականացուող աշխատանքները:
