Մայր Աթոռ Սուրբ Էջմիածինը բուռն հակադարձեց Կովկասի մահմետականներու առաջնորդ Ալլահշուքուր Փաշազատէին, որ անհիմն տուեալներով վարկաբեկած էր հայերն ու Հայ եկեղեցին: Ան նշած էր, թէ տարածաշրջանին մէջ տասնեակ դարեր գործած հայկական սրբավայրերը՝ ներառեալ Էջմիածինի Մայր Տաճարը, խորքին մէջ կը գտնուին «պատմական ատրպէյճանական հողերու վրայ», իսկ հայերը պարզապէս գրաւած են այդ տարածքը: Փաշազատէ նաեւ Հայ առաքելական եկեղեցին համարեց սպառնալիք մը՝ տարածաշրջանի երկիրներուն համար: Մայր Աթոռի հակադարձութիւնը յիշեցուց, որ Ատրպէյճանի ազգաշինութիւնը տեղի ունեցած է ընդամէնը նուազ քան դար մը առաջ՝ Խորհրդային միութեան քաղաքականութիւններուն պատճառով: «Ատրպէյճանի հոգեւոր առաջնորդին հրապարակային խօսքերուն մէջ շարունակաբար տեղ գտնող թշնամանքն ու կեղծարարութեան նման դատապարտելի դրսեւորումները ինքնին վկայութիւն են անոր, որ Ատրպէյճանը Փաշազատէի խօսքերով նշուած սպառնալիքն է տարածաշրջանին մէջ», յայտարարուեցաւ Ամենայն Հայոց Կաթողիկոսութենէն:
