Նշանաւոր հայ դերասան, կատակերգու, թատերական մեծ եւ փոքր պաստառներու արուեստագէտ, Հ.Խ.Ս.Հ. «Ժողովրդական արթիստ» կոչման արժանացած եւ «Մովսէս Խորենացի» շքանշանով պարգեւատրուած Արմէն Խոստիկեան ծնած է Երեւան։ Դպրոցը աւարտելէ ետք ընդունուած է բժշկական համալսարան, սակայն մէկ տարի անց հասկցած է, որ իր ուղին արուեստի մէջ է, եւ թողած է ուսումը։
1947-1951 թուականներուն ուսանած է Երեւանի Գեղարուեստա-Թատերական համալսարանի Արմէն Գուլաքեանի ղեկավարած դերասանական բաժնին մէջ։
Ուսանողական տարիներուն մարմնաւորած է զանազան դերեր՝ Փարսիղ (Ղազարոս Աղայեանի «Քանդած օջախ»), Տումանսկի (Աֆինոգենովի «Մաշենկա»), Լաունս (Շէյքսփիրի «Վերոնայի երկու ազնուականները»)։
1951 թուականէն սկսեալ աշխատանքի անցած է Երեւանի Գաբրիէլ Սունդուկեանի անուան թատրոնին մէջ, ուր ունեցած է արգասաբեր եւ վաստակաշատ բեմական ուղի։
1990-ականներուն կազմած է դերասանական խումբ մը եւ ներկայացումներով հանդէս եկած է մայրաքաղաքին եւ Հայաստանի տարբեր շրջաններուն մէջ։
1981 թուականին իր գրած «Աբելիկի արկածները» կատակերգութիւնը բեմադրուած է Սունդուկեանի թատրոնին մէջ։
Արմէն Խոստիկեան բազմաթիւ մասնակցութիւն ունեցած է հայկական ժապաւէններու եւ պատկերասփիւռային թատրոններու մէջ։ Յատկապէս յիշարժան են «Ոսկէ ցլիկ», «Նուագախմբի տղաները» եւ այլ ֆիլմեր։
Աւելի քան երկու տասնամեակ շարունակ ան դարձած է Ամանորի պատկերասփիւռային ծրագրերու սիրելի դէմք։
1987-ին հիմնած է թատերական «Փիւնիկ» սթուտիօն։
Մահացած է Երեւանի մէջ, 2003 թուականին։
