Լիբանանի քաղաքապետական ու թաղապետական ընտրութիւններու երրորդ եւ նախավերջին փուլէն երկու օր ետք, Ներքին գործերու նախարարութիւնը հրապարակեց մայրաքաղաքի ընտրական վերջնական արդիւնքները: Ինչպէս յստակացած էր նախնական հաշուարկով, քաղաքական գլխաւոր ուժերը մէկտեղող «Պէյրութը մեզ կը համախմբէ» ընտական ցանկը ապահովեց քաղաքապետական խորհուրդի 24 աթոռներէն 23-ը, մինչ «Պէյրութը քեզ կը սիրէ» ցանկին պարագլուխը համարուող Մահմուտ Ժամալ եւս յաղթանակ տարաւ: Ընտրութեան արդիւնքով, Սոցեալ Դեմոկրատ Հնչակեան Կուսակցութեան թեկնածու Յովհաննէս Պչաքճեան ստացաւ 38.890 քուէ, մինչ ցանկին առաջին դիրքը գրաւած Մոհամմատ Պալուզա ստացաւ 46.666 ձայն: Պչաքճեանի կողքին, Պէյրութի քաղաքապետական խորհուրդի անդամներ ընտրուեցան նաեւ հայազգի թեկնածուներ Սերժ Մելքոնեան եւ Վահրամ Պարսումեան: Թաղապետական ընտրութիւններուն առումով, մայրաքաղաքի Մտաուար թաղամասին մէջ ՍԴՀԿ-ի թեկնածու, թաղապետ Արմէն Սէֆէրեան վերստին ընտրուեցաւ այդ պաշտօնին՝ ստանալով 4182 քուէ:
