Անցնող երկու օրերուն Կազայի բնակչութիւնը ապրեցաւ արհաւիրքի պահեր եւ զոհերուն թիւը հատեց երկու հարիւրի սահմանը: Համասի կառավարութեան առողջապահութեան նախարարութիւնը երէկ յայտարարեց, թէ արեւածագի ժամերուն սկսած իսրայէլեան ռմբակոծումները պատճառած են առնուազն 51 զոհ՝ ներառեալ կիներ ու երեխաներ: Իսկ Կիրակի օր տեղի ունեցած իսրայէլեան յարձակումներուն պատճառով զոհուեցաւ առնուազն 148 մարդ: Ըստ նախարարութեան, զոհերուն կէսը ինկած է Կազա քաղաքին եւ հիւսիսային շրջաններուն մէջ: Մարդասիրական առումով, Առողջապահութեան համաշխարհային կազմակերպութիւնը յայտարարեց, թէ Կազայի մէջ երկու միլիոն մարդ մատնուած է սովի: Իսրայէլի վարչապետ Պենիամին Նեթանիահու միւս կողմէ շեշտեց, որ իսրայէլացի զինուորները «բացառիկ աշխատանք կը տանին Կազայի մէջ: Յաղթեցինք Հըզպալլային, իսկ այժմ պիտի յաղթենք նաեւ Կազայի մէջ», մերժելով հրապարակել գործողութեան յաւելեալ մանրամասնութիւններ:
