Լիբանանի դէմ իսրայէլեան ռազմական ոտնձգութիւններու ծիրին մէջ, ռազմական օդանաւեր երէկ թիրախ մը հարուածեցին Պեքայի հիւսիսարեւելեան Պուտայ գիւղի բարձունքներուն վրայ, պատճառելով նիւթական վնասներ: Առողջապահութեան նախարարութիւնը յայտարարեց, թէ սահմանային Քֆարքիլա գիւղին մէջ ուսէն վիրաւորուած է մարդ մը, երբ սահմանին միւս կողմը տեղակայուած իսրայէլեան ուժերը կրակ բացին խումբ մը լիբանանեան ինքնաշարժներու վրայ: Հարաւարեւելեան Հուլայի մէջ մարդ մը զոհուեցաւ իսրայէլեան անօդաչու սարքի հարուածներէն, իսկ սահմանային Պընթ Ժպէյլ գաւառի Սրըպպին գիւղին մէջ մոթորսիքլէթի մը թիրախաւորումէն վիրաւորուեցան երկու մարդ:
