Խորհրդարանին մէջ գումարուեցաւ առողջապահական հարցերու երեսփոխանական մնայուն յանձնաժողովի հերթական նիստը, որուն ընթացքին արծարծուեցան շարք մը օրինագիծերու սեւագրեր: Երեսփոխան Պիլալ Ապտալլա յայտնեց, որ «Ժողովրդավարական հանդիպում» խմբակցութեան ներկայացուցած առաջարկներէն մէկը կը վերաբերի հիւանդապահներուն աշխատավարձերուն եւ կը շեշտէ, որ անոնց նուազագոյն աշխատավարձը ըլլայ լիբանանեան նուազագոյն աշխատավարձին առնուազն եռապատիկը, որպէսզի կարելի ըլլայ կանխել այս կարեւոր ոլորտէն մարդկային ներուժի արտահոսքը: Ելեւմուտքի նախարար Եասին Ժապէր իր կարգին հաւաստիացուց, որ կառավարութիւնը անհրաժեշտ բոլոր քայլերուն պիտի ձեռնարկէ՝ վերակազմակերպելու համար երկրին ելեւմտական վիճակը:
