Լիբանանի մէջ քանի մը տարուայ յետաձգումներէն ետք, Լիբանանի մէջ զգալի հանդարտութեամբ եւ կազմակերպուածութեամբ տեղի կ’ունենան քաղաքապետական ու թաղապետական ընտրութիւնները: Լեռնալիբանանէն, Հիւսիսային Լիբանանէն եւ Աքքարէն ետք, նախանցեալ օր՝ Կիրակի, 18 Մայիս 2025-ին, նոյնքան հեզասահ ընթացան Պէյրութի, Պեքաայի եւ Պաալպաք-Հըրմէլի ընտրութիւնները՝ սահմանափակ խնդիրներով հանդերձ:
Ներքին գործերու նախարարութիւնը երէկ երեկոյեան հրապարակեց Արեւմտեան Պեքաա եւ Ռաշայա գաւառներու ընտրական արդիւնքները, ուր գերիշխող էին Ընկերվար յառաջդիմական կուսակցութեան եւ փոփոխութեան միտող ուժերուն ներկայացուցիչները: Ներքին գործերու եւ արդարադատութեան նախարարներ Ահմատ Հաժժար եւ Ատէլ Նասսար երէկ այցելեցին Պէյրութի Արդարադատութեան պալատ, ուր հետեւեցան քուէներու հաշուարկին: Հաժժար հաւաստիացուց, որ հաշուարկը կ’ընթանայ ընդունելի արագութեամբ:
Պաալպաք-Հըրմէլ ընտրատարածքին մէջ Հըզպալլայի եւ Ամալի ընտրամեքենան յայտարարեց քաղաքներու եւ գիւղերու մեծամասնութեան մէջ քաղաքապետական եւ թաղապետական յաղթանակներու մասին: Իսկ Զահլէի մէջ յատկանշական յաջողութեան հասաւ Լիբանանեան ուժեր կուսակցութեան զօրակցութիւնը վայելող Սալիմ Ղազալէի ընտրացանկը:
Պէյրութի պարագային ընտրական նախնական արդիւնքները ցոյց տուին, թէ խախտուած կրնայ ըլլալ քաղաքապետական խորհուրդի իսլամ-քրիստոնեայ հաւասար բաժնեկցութիւնը: «Պէյրութը մեզ կը համախմբէ» ցանկը շահած է քաղաքապետական խորհուրդի աթոռներուն մեծամասնութիւնը, սակայն եղած է առնուազն մէկ խախտում՝ մրցակից «Պէյրութը քեզ կը սիրէ» ցանկը գլխաւորող Մահմուտ էլ-Ժամալի կողմէ, որ կը վայելէ մայրաքաղաքի երեսփոխաններէն Նապիլ Պատրի զօրակցութիւնը: Պատր տեղի ունեցածը որակեց յատկանշական յաջողութիւն, մերժելով խօսիլ էլ-Ժամալի հաւանական հրաժարականին մասին, որպէսզի պահպանուի իսլամ-քրիստոնեայ հաւասարութիւնը: Ազգային ազատ հոսանքի նախագահ Ժըպրան Պասիլ դիտել տուաւ, որ նշեալ խախտումը կը պարտաւորեցնէ բարեփոխել լիբանանեան օրէնքները եւ անոնց մէջ ամրագրել հաւասար բաժնեկցութեան սկզբունքը:
