Ամերիկացի յատուկ դեսպան Սթիվ Ուեթքոֆ առաջարկեց, որ Հայաստանն ու Ատրպէյճանը եւս միանան Աբրահամեան համաձայնագրերու ընդլայնումին: «Կը կանխատեսեմ, որ համեմատաբար շուտով տեսնենք Լիբանանի եւ նոյնիսկ Սուրիոյ մէջ իրավիճակի կարգաւորում», ըսաւ ան, չբացառելով նաեւ Լիպիոյ միացումը նշեալ համաձայնագրին: «Երբ կը խօսիմ Աբրահամեան համաձայնագրերուն մասին, ապա այդ կրնայ պատահիլ Հայաստանի եւ Ատրպէյճանի հետ եւս: Մենք շատ մօտ ենք այդ երկիրներուն մէջ հակամարտութիւններու վերջնական լուծումին», ըսաւ Ուեթքոֆ: Ան հաւանական համարեց, որ «մօտիկ ապագային 5-6 երկիրներ եւս միանան համաձայնագրին, շեշտելով աշխարհին մէջ խաղաղութիւն հաստատելու ուղղութեամբ նախագահ Տոնըլտ Թրամփին ջանքերը»: Յիշեցնենք, որ Աբրահամեան համաձայնագրերը 2020-21 տարիներուն Իսրայէլի եւ արաբական շարք մը երկիրներու միջեւ կնքուած համաձայնագիրն է եւ այժմ աշխատանք կը տարուի անոր միացնել նաեւ արաբական շարք մը երկիրներ՝ մասնաւորաբար Սէուտական Արաբիան:
