Փուլային դրութեամբ կազմակերպուող Լիբանանի քաղաքապետական ու թաղապետական ընտրութիւնները հասած են միջնակէտի: Յառաջիկայ Կիրակի, 18 Մայիսին, տեղի պիտի ունենայ մայրաքաղաք Պէյրութի ընտրական փուլը, որմէ ետք կարգը կը հասնի նաեւ Պեքաային, հարաւին ու Նապաթիէին: Նախանցեալ շաբաթավերջի Լեռնալիբանանի ընտրութիւններէն ետք, Ներքին գործերու նախարարութիւնը երէկ հրապարակեց նաեւ երկու օր առաջ Հիւսիսային Լիբանանի եւ Աքքարի գաւառներուն մէջ կատարուած ընտրութիւններուն պաշտօնական արդիւնքները: Ներքին գործերու նախարար Ահմատ Հաժժար երէկ յայտնեց, որ հիւսիսային Լիբանանի գաւառներուն մէջ քուէարկութեան մասնակցութեան համեմատութիւնը հասած է 37,25 առ հարիւրի, իսկ Աքքարի մէջ՝ 49,33-ի: Ըստ նախարարին, կրակոցներուն հետեւանքով բանակին մօտ երէկ ձերբակալուած կը մնար 24 մարդ:
Ընտրական այս երկրորդ փուլը ընթացաւ ապահովական որոշակի խախտումներով, մասնաւորաբար Թրիփոլիի մէջ, ուր ընտրական օրը աւարտեցաւ տօնական ծանր հրաձգութեամբ եւ վիրաւորներով, որոնց շարքին էր հեռուստային լրագրող Նատա Անտրաուսը, որ վիրաւորուեցաւ անկանոն արձակուած փամփուշներէն: Մօտակայ Տանիէ գաւառին մէջ ալ հրաձգութեան փոխանակումի հետեւանքով ինկաւ երեք վիրաւոր: Լիբանանեան բանակը յայտարարեց, թէ հիւսիսի եւ Աքքարի մէջ ընտրական արդիւնքներու յայտարարութենէն ետք ձերբակալուած է տօնական կրակոց արձակած 35 մարդ:
Վարչապետ Նաուաֆ Սալամ անդրադարձաւ ընտրական կաշառքի հարցին եւ զգուշացուց, թէ նշեալ օրինախախտումը կատարողները պիտի հետապնդուին եւ խստիւ պատժուին: Սալամ խոստացաւ ձերբակալել նաեւ ընտրական օրերուն երկրին ապահովութիւնը վտանգողները: Ան դրուատեց ապահովական եւ զինուորական ուժերուն արագ միջամտութիւնը՝ կանխելու համար ապահովական միջադէպերուն ընդարձակումը:
