Հայաստանի մէջ Եւրոպական միութեան գրասենեակը հրապարակած է ԵՄ դեսպան Վասիլիս Մարակոսի ուղերձը Եւրոպայի օրուան առիթով:
«Մայիս 9-ին մենք կը նշենք Եւրոպայի օրը՝ եւրոպական միասնութեան եւ Եւրոպայի ու ամբողջ աշխարհի մէջ խաղաղութեան օրը։
Եօթանասունհինգ տարի առաջ՝ 1950 թուականին, Շումանի հռչակագրով, Եւրոպան կատարեց գիտակցուած ընտրութիւն՝ հակամարտութեան եւ պառակտման փոխարէն ընտրելով խաղաղութիւնն ու հաշտեցումը։ Այս կերպ մենք ընտրեցինք ապագան անցեալի փոխարէն, խաղաղութիւնը՝ պատերազմի փոխարէն, միասնութիւնը՝ պառակտման փոխարէն։
Այսօր մենք կը շարունակենք պայքարիլ յանուն մեր արժէքներու, բարեկեցութեան, ազատութեան եւ համագործակցութեան։ Եւրոպական միութիւնը յանձնառու է խաղաղութեան, գործընկերութեան եւ համագործակցութեան՝ Եւրոպայի մէջ եւ անդին։ Ամբողջ աշխարհի մէջ բարեկեցութեան, անվտանգութեան եւ բարեփոխումներու ոլորտին մէջ մենք սկզբունքային եւ վստահելի գործընկեր ենք։
Հայաստանի մէջ եւս մենք կը նշենք Եւրոպայի օրը։ Մենք կը նշենք խաղաղութեան, ժողովրդավարութեան եւ գործընկերութեան հանդէպ մեր յանձնառութիւնը։ Միաժամանակ կը նշենք նաեւ մեր մշակութային կապերը, քանզի հայկական եւ եւրոպական մշակոյթները սերտօրէն փոխկապակցուած են։
Մենք կ’աշխատինք Հայաստանի հետ նոր գործընկերութեան օրակարգի շուրջ։ Տրուած է նաեւ մուտքի արտօնագրերու ազատականացման շուրջ երկխօսութեան մեկնարկը, եւ Եւրոպական միութիւնը պիտի շարունակէ աջակցիլ Հայաստանի դիմակայունութեան, տնտեսութեան եւ բարեփոխումներուն։ Եւրոպական միութեան եւ Հայաստանի միջեւ յարաբերութիւնները երբեւէ այսքան սերտ չեն եղած։ Անոնց հետագայ ամրապնդումը կախուած է երկու կողմին իրականացուելիք աշխատանքէն։
Մենք նաեւ կ’աջակցինք տարածաշրջանին մէջ խաղաղութեան ու յարաբերութիւններու կարգաւորման։ Հայաստանի մէջ տեղակայուած ԵՄ դիտորդական քաղաքացիական առաքելութիւնը մեր կուռ յանձնառութեան վկայութիւնն է։
Կը շնորհաւորեմ բոլորը Եւրոպայի օրուան առիթով։
Շնորհաւո՛ր Եւրոպայի օր»,- նշուած է ուղերձին մէջ:
