Հայաստանի արտաքին գործերու նախարար Արարատ Միրզոյեան յայտնեց, որ խաղաղութեան պայմանագրի ստորագրումին առնչութեամբ գուցէ յառաջիկային ըլլան լաւ նորութիւններ: «Մենք պատրաստ էինք վայրկեան առաջ սկսելու խորհրդակութիւններ, հիմա ալ պատրաստ ենք», վստահեցուց նախարար Միրզոյեան: Երեւանի քաղաքապետ Տիգրան Աւինեան իր կարգին նշեց, թէ մինչ աշխարհը կանգնած է լուրջ մարտահրաւէրներու առջեւ, «մեր գերագոյն նպատակը պիտի ըլլայ կայուն եւ ապահով միջավայրի մը ստեղծումը»:
Հայ որբերու օգնութեան ընկերութեան (SOAR) Պուէնոս Այրէսի մասնաճիւղի տնօրէն Լուսիանա Մանուկեան ահազանգեց, թէ Պաքուի մէջ բանտարկուած լիբանանահայ Վիգէն Իւլճէքեան աւելի քան 15 օրէ ի վեր դիմած է հացադուլի: Ըստ անոր, հայազգի գերին ընդամէնը կը պահանջէ հեռախօսազրոյց մը ունենալ տիկնոջ՝ Լինտային հետ: Նշենք, որ ըստ Ժընեւեան ուխտին եւ միջազգային կանոններուն, պատերազմի գերիներուն տարրական իրաւունքներէն մէկն է որոշ ժամանակը անգամ մը հեռախօսային կապով հաղորդակցիլ հարազատներուն հետ:
