Հայրենական մեծ պատերազմին Համաշխարհային երկրորդ պատերազմի յաղթանակին 80-ամեակին առթիւ, Հայաստանի վարչապետ Նիկոլ Փաշինեան, բազմաթիւ երկիրներու ղեկավարներուն եւ ներկայացուցիչներուն կողքին, Մոսկուայի Կարմիր հրապարակին վրայ ներկայ գտնուեցաւ տօնական շքերթին եւ ունեցաւ երկկողմանի զրոյցներ: Ան նաեւ հանդիպում ունեցաւ այս առթիւ Հայաստանէն Ռուսիա ուղղուած հայազգի վեթերաններ Խաչիկ Յովակիմեանին եւ Վոլոտիա Կսպոյեանին հետ:
Նոյն տօնը նշուեցաւ նաեւ Հայաստանի մէջ: Երեւանի «Յաղթանակ» զբօսայգիին մէջ կազմակերպուեցաւ «Անմահ գունդի» շքերթը, ներկայութեամբ վեթերաններու, քաղաքական գործիչներու եւ դիւանագէտներու: Շքերթին ընթացքին ծածանեցան Հայաստանի եւ Արցախի դրօշները, ինչպէս նաեւ Հայրենական մեծ պատերազմին մասնասկցած հայկական ջոկատներուն դրօշները: Իսկ առաւօտեան, Հայաստանի նախագահը, արտաքին գործերու եւ պաշտպանութեան նախարարները ծաղկեպսակներով եւ ծաղիկներով յարգեցին իրենց կեանքը հայրենիքին համար զոհաբերած հերոսներուն յիշատակը:
