Կաթողիկէ աշխարհին համար Հռոմի պապի ընտրութեան աննախադէպ արդիւնքով, պատմութեան մէջ առաջին անգամ ըլլալով ամերիկացի մը ընտրուեցաւ Վատիկանի Սրբազան քահանայապետ: Ինչպէս կը կանխատեսէին մեկնաբանները եւ վատիկանեան հարցերու մասնագէտները, վախճանեալ Ֆրանչիսկոս պապին յաջորդողին ընտրութիւնը իրականացաւ ընդամէնը երկու օրուան ընթացքին եւ Հինգշաբթի օր յայտարարուեցաւ, թէ ամերիկացի Ռոպըրթ Ֆրանսիս Փրեւոսթ կարտինալը դարձած է սրբազան քահանայապետ, առնելով Լեւոն (Լէօ) ԺԴ. պապական անունը: Ծիրանաւորներուն տրուած իր անդրանիկ քարոզին մէջ նորընտիր պապը շեշտեց, թէ նորօրեայ աշխարհին մէջ եկեղեցին պէտք է դառնայ փարոս մը՝ լուսաւորելու համար աշխարհին գիշերները:
Ամերիկեան Շիքակօ քաղաքին մէջ ծնած նորընտիր պապը վատիկանեան առաջին պատարագը պիտի մատուցէ շաբաթ մը ետք՝ 18 Մայիսին: Ան երէկ զգուշացուց աշխարհին մէջ հաւատքի թուլացումին հետեւանքներէն: 69 տարեկան պապը եկեղեւոյ մէջ կը համարուի որպէս բարեկարգող մը, երկար տարիներ որպէս եպիսկոպոս ծառայած է Փերուի մէջ եւ ամերիկեանին կողքին կը կրէ նաեւ նշեալ պետութեան քաղաքացիութիւնը: Վերջերս, ան Վատիկանի մէջ կը վարէր կարեւորագոյն գրասենեակներէն մէկը՝ եպիսկոպոսական նշանակումներուն գրասենեակը եւ կը սպասուի, որ շարունակէ վախճանեալ պապին բարեկարգչական ուղեգիծը:
Նոր պապին ընտրութիւնը շնորհաւորեցին աշխարհով մէկ: Միացեալ Նահանգներու նախագահ Տոնըլտ Թրամփ հպարտութիւն յայտնեց ամերիկացի պապի մը ընտրութեան վերաբերեալ, իսկ վարչապետ Նիկոլ Փաշինեան շնորհաւորեց Հռոմի պապը, նշելով որ այս դժուարին օրերուն պապին խաղաղութեան եւ կարեկցանքի ձայնը աւելի կարեւոր է, քան երբեք: Ամենայն Հայոց Գարեգին Բ. կաթողիկոսը իր կարգին աղօթեց, որ «Աստուած ուժ եւ շնորհ պարգեւէ սրբազան քահանայապետին»:
