Հանրապետութեան նախագահ Ժոզէֆ Աունի գլխաւորութեամբ երէկ գումարուեցաւ Պաշտպանութեան գերագոյն խորհուրդի նիստ, որուն ընթացքին քննարկուեցաւ երկրին ու տարածաշրջանին մէջ տիրող ապահովական վիճակը, առկայ վտանգները եւ անհրաժեշտ քայլերու ձեռնարկումը: Նախագահը նիստին ընթացքին ներկայացուց խորհուրդին պարտականութիւնները եւ լիազօրութիւնները, շեշտելով երկրին կայունութիւնը ամրապնդելու եւ լիբանանեան բոլոր շրջաններուն վրայ պետութեան հեղինակութիւնը պարտադրելու անհրաժեշտութիւնը: Աուն նախարարներէն պահանջեց ապահովական անհրաժեշտ քայլերու ձեռնարկել՝ երաշխաւորելու համար քաղաքապետական ու թաղապետական ընտրութիւններուն հեզասահ ընթացքն ու ընտրողներուն ապահովութիւնը: Անդրադառնալով Սուրիոյ զարգացումներուն, նախագահը ահազանգեց ապակայունութիւնը Լիբանան փոխադրելու վտանգներէն, շեշտելով որ Լիբանանի հողային ամբողջականութիւնը գերկարեւոր հարց է: Ժողովականները քննարկեցին լիբանանեան հողերէն կատարուած հրթիռարձակումները, նախագահ Աուն Լիբանանի զօրակցութիւնը յայտնեց պաղեստինցիներուն, սակայն զգուշացուց Լիբանանը նոր պատերազմի մղող վտանգաւոր արարքներէն: Ժողովականները ապա կառավարութեան առաջարկեցին խիստ զգուշացում փոխանցել Համաս շարժումին ե պահանջել, որ չկատարէ Լիբանանի անվտանգութեան սպառնացող որեւէ գործողութիւն: Խորհուրդը առաջարկեց շեշտել, որ Լիբանան պիտի դիմէ խիստ միջոցներու, եթէ նման արարքներով վերստին վտանգուի Լիբանանի գերիշխանութիւնն ու կայունութիւնը:
