Դամասկոսի գիւղական շրջաններուն մէջ բռնկած արիւնալի բախումներուն լոյսին տակ, իսրայէլեան օդուժը հարուածեց շարք մը թիրախներ, մինչ բանբեր Աւիխայ Ատրահի պատճառաբանեց, թէ յարձակումը թիրախաւորած է Սուրիոյ տիւրզիներուն վնաս պատճառած ահաբեկչական կազմակերպութիւններ: Անոր համաձայն, բանակը կը հետեւի զարգացումներուն եւ պատրաստ է անհրաժեշտութեան պարագային միջամտելու անհրաժեշտ միջոցներով: Իսկ վարչապետ Պենիամին Նեթանիահու եւ պաշտպանութեան նախարար Իսրայէլ Քաց յայտնեցին, որ բանակը զգուշացնող յարձակումներ կատարած է ծայրայեղականներու դէմ, որոնք կը պատրաստուէին յարձակիլ Սահնայայի տիւրզիներուն դէմ:
