Սուրիոյ հիւսիս-արեւմուտքի ծովեզերեայ շրջաններուն մէջ վերջերս տեղի ունեցած յարանուանական արիւնալի խնդիրներէն ետք, հարաւի սահմանային շրջաններուն մէջ յառաջացած լարուածութիւնը անցնող երկու օրերուն հասաւ Դամասկոսի հարաւային արուարձաններ, ուր մասնաւորաբար Սահնայա եւ Ժարամանա շրջաններուն մէջ տեղի ունեցան բախումներ տիւրզի զինեալներուն եւ ապահովական ուժերուն միջեւ, պատճառելով առնուազն 14 մահ եւ շարք մը վիրաւորներ: Սուրիոյ Տեղեկատուութեան նախարարութիւնը յայտարարեց, թէ անծանօթ զինեալներ խախտած են զինադադարի համաձայնութիւնը եւ կրակ բացած այդ շրջանին մէջ ապահովական գործողութիւն կատարող զինուորներուն վրայ: Խնդիրը սկսած էր ընկերային հաղորդակցութեանց ցանցին վրայ Մոհամմատ մարգարէին նկատմամբ վիրաւորական ձայնագրութեան մը տարածումով, որ վերագրուեցաւ տիւրզի շէյխի մը, թէեւ վերջինս ժխտեց իր մեղսակցութիւնը: Իսկ Երեքշաբթի գիշեր զինադադար կնքուեցաւ կառավարութան եւ տիւրզի խմբաւորումներուն միջեւ:
